Kyntu u MLA ka Nongpoh ia ka Kong Bindas Syiem ban sangeh noh ia ka jingiakhih shah thngan

Syllad | The Rising MeghalayaJune 8, 2024

U MLA ka UDP na Nongpoh u Bah Mayralborn Syiem ha ka 7 tarik mynta u bnai u la kyrpad ia ka Kong Bindas Syiem ka nongshong shnong jng ka shnong Umden, Ri Bhoi ba kan pynsangeh noh ia ka jingiakhih shah thngan jong ka namar ka jingpynkhreh ban shna noh ia ka surok ba 58 kilomitar na Nongpoh – Umden sha Sonapur ka la iaid shakhmat.

“Nga kyntu ia ka longkmie Kong Bindas Syiem ba kan pynkut noh ia kane ka jingiakhih shah thngan jong ka hakhmat Additional Secretariat kaba la sdang naduh ka 6 tarik mynta u bnai,” ong u Bah Syiem haba pynthikna ruh ban buddien halor kane ka kam bad ka sorkar.

Namar ba la ngiah ia ki jingkular thok ha ki por ilekshon, ka Kong Bindas ha ka 6 tarik mynta u bnai ka la pynlong da ka jingiakhih shah thngan hakhmat Secretariat ban dawa na ka bynta ban shna noh mardor ia ka surok Nongpoh-Umden sha Sonapur kaba la jot rathai.Hadien la pynkynriah noh sia ka shapoh ka jaka pynieng kali marpyrshah ka Additional Secretariat.

Ha kaba iadei bad ka jinglong jong kane ka surok, u Bah Mayralborn u la ong, “Nga kwah ban pynpaw hangne ba ka jingpynkhreh ban shna ia kane ka surok ka la iaid shakhmat, Nga kwah ruh ban pynpaw khamtam sha ki paidbah ka thain Umden Area bad baroh ki shnong kiba kane ka surok kan iaid lyngba ym duna na kumba 150 tylli ki shnong ba kin ioh ia ki jingmyntoi lyngba kane ka surok.”

“Kumta ka jingkyrpad ka jong Nga ia ki nongshong shnong ka constituency jong nga ba kin long kiba iaishah.Kum u nongmihkhmat uba la jied bad shaniah ha nga, nga la pyrshang ia kaba bha tam, kata ym tang ha kaba iadei bad ka lynti surok, hynrei la ka long ha ka liang ka umbam umdih, ha ka liang ka koit ka khiah, ka pule pule, Nga la pyrshang ia kaba bha tam katba lah ka bor,” u la ong.

 Nalor kata une u MLA u la pyntip ba na ka liang u Symbud Myntri Rangbah ka Jylla u Bah Prestone Tynsong ruh u la pynthikna ba ia kane ka lynti surok yn pyndep noh hapoh jong une u snem.