Kyntu u MP ka VPP ia ka Sorkar Pdeng ban pynbha noh mardor ia ka surok bah NH-6 ha Meghalaya

Syllad | The Rising MeghalayaJuly 2, 2024

U MP ka liang pyrshah Voice of the People Party (VPP) na Shillong, u Dr. Ricky AJ Syngkon u la pan ia ka jingiarap jong ka Sorkar Pdeng na ka bynta ban shna pynbha noh mardor ia ka surok bah National Highway-6 ha kane ka jylla Meghalaya.

Ha ka memorandum ba la ai sha u Myntri ka Tnad Road Transport & Highway ka Sorkar Pdeng u Nitin Jairam Gadkari ha ka 1 tarik Naitung, u Dr. Syngkon u la ong, “Nga kyntu ïa ka ophis jong phi ba kan sngewbha ban shimkhia ban tuklar lem bad ban shim mardor ia ki lad ki lynti kiba donkam halor kane ka bynta khnang ban weng ia ka jingeh jong ki nongshong shnong ka Jylla.”

U la pynpaw ruh ba ka surok NH-6 kaba dei ka surok kaba kongsan bha kaba iaid lyngba ia ka jylla Meghalaya, Assam, Tripura bad Mizoram.

Ka surok bah NH 6 ka dei kaba pyniasoh ia ki katto katne ki nongbah bad ki shnong kiba kongsan bha ha kine ki 4 tylli ki jylla kiba kynthup ia ka Jorabat, Shillong, Jowai, Silchar, Aizawl, Agartala bad ka kut hajan khappud ka India bad Myanmar.

Nalor kata u Dr. Syngkon u la ong ba ka bynta jong kane ka surok kaba hap hapoh ka East Jaintia Hills District ka Meghalaya ka dei kaba la julor bad jot rathai, kata khamtam ki bynta ka sor Jowai haduh Ratacherra ha kaba ki nongleit nongwan ki hap ban iaid lyngba ka jingeh kaba khraw namar ka jingsniew palat pud jong kane ka surok.

“Ka jinglong jingman ka la nang kham sniew shuh shuh ha ka por lyiur ba jur slap kaba la pynlong ia ki nongleit nongwan ba kin sahkut da ki bun bun sngi ban poi sha ka jaka kaba ki thmu ban leit. Kane ka mat ka la neh mynta lah kumba katto katne snem bad kaba la wanrah shisha ia ka jingeh kaba khraw bad ka jingduhnong ha ka liang ka ioh ka kot bad wat haduh wat ka jingduh noh ia ki mynsiem briew ba kordor jong ki nongshong shnong kine ki sawtylli ki jylla, kata ka Meghalaya, Assam, Mizoram bad Tripura,” pynpaw une u MP ka Shillong lyngba katei ka jingthoh.