Kyntu u Myntri ban shim kabu lyngba ka skhim PM Vishwakarma ha ka prokram haka shnong Tynring

Syllad | The Rising MeghalayaNovember 25, 2023

U Myntri khynnah ka tnat Micro, Small and Medium Enterprise ka sorkar pdeng, u Bhanu Pratap Singh Verma u la ong ba nalor ka skhim PMEGP, ka Sorkar hapoh ka jingialam u Myntri Rangbahduh ka Ri, U Narendra Modi u la wanrah sa ia kawei pat ka skhim  bathymmai kaba tip kum ka PM Vishwakarma, kata ha ka jingkren ha ka prokram “Hamara Sankalp Vikasit  Bharat  (HSVB)” kaba la pynlong da ka ophis ka BDO, Mawryngkneng C & RD Block, East Khasi Hills District ha ka shnong Tynring.

Ia kane ka prokram la pynlong da ka jingiatreilang bad ka ophis ka Deputy Commissioner, East Khasi Hills bad ki tnat sorkar bapher bapher.

Ha ka jingkren u Bhanu Partap Singh ula ong ba kane ka skhim ka aijingkyrshan ia kiba trei ia ki kam tynrai bad kiba shna ia ki tiar ne trei da la ki kti ha ki thain nongkyndong ne ha sor jong ka ri India, kaba dei ka skhim hapoh ka ministry jongka MSME.

U la ong ruh ba kan don kumba 18 tylli ki jait kam tynrai ki ban kynthup ha kane bad lyngba kane ka skhim kan don ruh ka jingiarap ha ka rukom ka grant kaba 15 hajar tyngka na ka bynta ban thied ia ki tiar ban pyndonkam ban trei bad nalor kata kin ioh ruh ia ka stipend kaba long 500 tyngka shi sngi ha ka por training.                                                                     

Haba pynpaw ia ki kam kiba ka sorkar pdeng ka la wanrah na ka bynta ka bha ka miat ki paidbah kumka skim PM-Ujjwala kaba ai ei ia ka Gas connection sha ki longiing  ba duk, u la khot bad wer ia ki paidbah ban shim ia kum kine ki lad jingiarap na ka sorkar na ka bynta jong ki.

U Myntri ka Tnat ri jingri bad doh ka Sorkar jylla, U Bah AL Hek, haba kren ha kane ka sngi u la ong ba ka sorkar pdeng hapoh ka jingialam u Narendra Modi ka la wanrah shibun ki jingmyntoi na ka bynta ki paidbah khlem da peit shiliang khmat la ki dei ha kano kano ka niam ne jaidbynriew. U la ong ruh ba ka sorkar jylla hapoh ka jingialam u Myntri Rangbahduh, U Conrad Sangma dang shen ki la wanrah ia ka skim CM-Elevate na ka bynta ban plie lad ia kito kiba thmu ban seng ki kam ki jam la jong da kaba shim ki lad jingiarap lyngba na kane ka skhim.

La sakhi ruh ia kane ka sngi da ka jingiadonlang u MLA ka Mawryngkneng u Bah. Heavingstone Kharpran. Ha shuwa kane, ka DC, East Khasi Hill Distrct, ka Kong  RM Kurbah, IAS ka la ialam ban shim ia ka jingkular ne ka ‘Panch Pran Pledge’ ha ka ban pynlong ia ka ri India kaba kiew ba roi bad ban ieng ha la ki kjat shuwa ka 2047.

Shuh shuh ha kane ka sngi la iohi ruh ia ki sakhi na ki nong ioh skim PMAY-G bad kumjuh ruh na ki SHG kiba hap hapoh ka jingpeit jingkhmih ka NRLM.

Ia ka prokram la pyniaid da ka Kong AR Kynta, MCS, BDO, Mawryngkneng C & RD Block. La ioh ruh ka jingkren na u Sardar ka Tynring, Bah W Nongrum ha ryngkat ka jingiadonlang u Mission Director SRES, S Sadhu, IAS, Jt Director, SRES, Kong I Diengdoh,  PD-DRDA, EKH,  Bah PT Passah, MCS, ADC i/c Planning, Kong DD Syngai, MCS, ki ophisar bad ki staff na ki tnat bapher bapher kaba kynthup ia ka  Agriculture, Horticulture, Health, DCIC, PHE, ICDS bad kiwei kiwei de, kiba kynthup ia ki dkhot ka DS, Tynring, SHGs, PGs, ki khynnah samla shynrang bad kynthei kiba don palat  500 ngut.

Ha kane ka sngi ka la don ruh ka jingpynrung kyrteng ha ka Aadhaar, MHIS bad ka health check-up. Iakane ka prokram la pynbit pynbiang da ki staff ka Mawryngkneng C & RD Block kiba kynthup ia ki GS, APO, SBM, BFT, NRLM bad EFC (MBMA/MBDA).