Kyntu u Myntri ia ki samla pule NEHU ba pynlong jingiakhih ban sangeh ia ka jingshah thngan

Syllad | The Rising MeghalayaNovember 20, 2024

U Myntri ka Tnad Pule Puthi u Rakkam A Sangma ha ka 19 tarik Naiwieng u la pynpaw ka jingsngewkhia halor ka jinglong jingman ha ka koit ka khiah jong ki samla pule ka skulbah North Eastern Hill University (NEHU) hadien ba ki la pynlong ia ka jingshah thngan kaba la iaid lah 15 sngi mynta.

Namar kane ka jinglong jingman na ka liang u Myntri u la kyrpad ia ki samla pule ba kin pdiang na ka bynta ban pynsangeh shwa ia kane ka jingshah thngan ka jong ki namar na ka liang ka Sorkar Pdeng ka la dep ban thung da ka Inquiry Committee ban pynlong ia ka jingtohkit halor ka jinglong jingman hapoh kane ka skulbah.

Haba kren sha ki lad pathai khubor u Rakkam u la ong, “Nga kyrpad ia ki samla pule baieid jong nga, lada ki lah ban pynsangeh noh ia ka jingiakhih ka jong ki bad ap ia ka jingai jingmut ne ka jingmih na ka jingtohkit namar ka koit ka khiah jong ki ka long kaba kongsan, ka pule puthi ruh ka long kaba kongsan..ngim lah ban iapein ia ki da kumno kumno ruh.”

U Myntri u la pyntip ruh ba na ka liang u Myntri Rangbah ka Jylla u Conrad K Sangma u la dep ban shimkhia ia kane ka kam bad ka Sorkar Pdeng ba kan tuklar bad leh ei ei noh. U la ong ruh ba ka Committee ba la thung da ka Sorkar India shen kan sa ai ia ki jingai jingmut.