Kyntu u Myntri ka Tnat Cooperation ban phaikhmat sha ki kam lajong ban kyntiew ia ka ioh ka kot

Syllad | The Rising MeghalayaNovember 15, 2023

U Myntri ka Tnat Cooperation ka sorkar Jylla u Bah Comingone Ymbon haka 14 tarik Naiwieng u la plie ia ka jingrakhe  “70th All India Cooperative Week” ha Moosyiem Shangpung, West Jaintia Hills District ha kaba u la kyntu khamtam ia ki samla ba ki dei ban phaikhmat sha ki kam lajong na ka bynta ban kyntiew ia ka ioh ka kot bad ka roi ka par.

Ia kane ka jingrakhe ba la pynlong halor ka mat “Role of Cooperative Marketing in India: A five trillion Dollar Economy and Sustainable Development Goals,” kaba la pynlong da ka Tnat Cooperation ha ryngkat ka jingiatreilang bad ka Meghalaya Cooperative Apex Bank Ltd, Rural Finance Shillong, bad Meghalaya Livelihoods and Access to Markets Projects (Megha-LAMP) of Meghalaya Basin Management Agency (MBMA).

Ka jingiamir jingmut ba kongsan jong kane ka sngi kalong halor ka phang “Recent Developments in Cooperatives.”

Haba kren ha ka jingialang u Bah Ymbon u la pynpaw ruh halor ka jingkongsan ban pynkhlain ia ki kam iatreilang na ka bynta ban kyntiew ia ka ioh ka kot bad ka roi ka par. U la kyntu ruh ia ki dkhot ba kin iashim bynta shitrhem na ka bynta ban pyntreikam bha ia ki projek ba la kyrshan da ka sorkar ban ai mynsiem na ka bynta ban long ki nongseng kam seng jam lajong. Nalor kata u Myntri u la pynshlur ruh ia ki kmie ki kpa kumjuh ia ki samla wad kam wad jam ba kin pynleit jingmut sha ki kam lajong ha ka jaka jong ki kam sorkar.

Haba kdew halor ki sienjam lyngba ka jingpyntreikam ia ka skhim CM Elevate, u Myntri u pyntip sha ki nongwan iashim bynta halor ki lad ki kabu na ka bynta ki nongseng kam lajong halor ki skhim bapher bapher kiba aijingkyrshan ban kyntiew ha ki kam jngohkai pyrthei, ka rep ka riang bad ha kiwei kiwei pat ki bynta.

Ha kane ka sngi la ia don lang ruh u Bah W K Kharbuli, Additional Deputy Commissioner, West Jaintia Hills, Kong R C Sohkhlet Registrar Cooperative Societies, MD Meghalaya Cooperative Apex Bank, ki Ophisar na ka tnad Cooperation, Megha- LAMP, MBMA bad Meghalaya Cooperative Apex Bank Ltd bad kiwei kiwei.