Kyntu u Project Director ia ki nongtrei SSA ba pynlong jingiakhih ban bteng noh ia la ka kam

Syllad | The Rising MeghalayaAugust 15, 2024

U State Project Director ka Samagra Shiksha Abhiyan (SSA) u Swapnil Tembe ha ka 14 tarik Nailar u la kyntu ia ki nongtrei SSA ba kin bteng biang ia la ki jong ki kamram jong ki namar na ka liang ka Rationalisation Committee ka la dep lypa ban don hapdeng ka jingpynbeit ia ka jingdawa pynkiew tulop ka jong ki.

Katkum ka jingpynpaw ka jong u, ka jingiakhih shong kyllain mungor kaba dang iai bteng jong ki nongtrei SSA (Non-Teaching Staff) naduh kine ki 15 sngi ba la dep ka la ktah jur ha kaba iadei bad ka jingpyllait tulop sha ki palat 10,000 ngut ki nonghikai SSA.

“Kumta namar ka Rationalisation Committee ka la don lypa hapdeng ka kam, kumta ka long kaba kongsan ba kine ki nongtrei SSA ba kin bteng noh ia la ka jong ka kam hapoh ka prokram na ka bynta ka jingiaid beit iaid ryntih kumba la thmu,” ong u Tembe lyngba u kyrwoh.

Nalor kata u la ong ruh ba wat hapdeng kine ki jingai jingmut, hynrei kane ka jingiakhih jong kine ki nongtrei ka dang iai bteng bad kaba la wanrah ka jingpynslem ha kaba pyllait ia ka tulop jong ki nonghikai, ban pyntreikam ia ki jingiarap bapher bapher kiba hap hapoh ka SSA bad ban pyntreikam ia ki prokram jong ka Right to Education (RTE) kum ka jingai ia ki uniform grant, library grant, school grant bad kiwei pat.

“Ki don haduh palat 10,000 ngut ki nonghikai SSA ki bym lah satia ban ioh ia ka tulop jong u bnai Naitung ba la dep haduh mynta namar kane ka jingiakhih. Watla katta la shim ia ki sienjam ban weng ia kane ka jingeh bad ban wad da kiwei pat ki lad ki lynti,” u la ong.

Lah ban kdew ba dang shen ka sorkar ka la ai ka jingmynjur ban pynkiew 25% ka tulop ia kaba la kyntait ban pdiang da ka seng jong ki nongtrei SSA bad hadien ki la bteng ia ka jingiakhih shong kyllain mungor bad ieng skhem halor ka jingdawa kyntiew tulop  kaba 80%.

Nalor kata hadien kane, ka sorkar jylla ka la thaw ia ka Rationalization Committee kaba la khlieh da u Commissioner & Secretary, ka tnad Pule puthi ha ryngkat ki nongmihkhmat na ka seng bad ka la dep ban pynlong haduh 3 tylli ki jingialang ban iakren ia ki jingeh jong ki bad ban wanrah ia ka rukom pynbeit ia ka tulop jong kine ki nongtrei.

U Tember u la ong ba ka Rationalisation Committee ka la khmih bniah ia ka jingsiew tulop jong baroh ki nongtrei hapoh ka Jylla, District bad Block level bad ki donkam ban pyrkhat sani bha ban ia kiwei pat ki kyrdan bad ban pynshong nongrim ia ka jingsiew tulop katkum ka jingshakri slem, ka kam ba ki trei kynthup ruh ia ka kyrdan jingpule.