Kyntu u Thombor Shiwat ia ka Sorkar ban pyllait T.50 klur ban pynkhuid ia ka tulop ba 12 bnai jong ki nongtrei ka JHADC

Syllad | The Rising MeghalayaJanuary 17, 2025

U nongialam ka Jaintia Hills Autonomous District Council (JHADC) u Ma Thombor Shiwat u la kyntu ia u Symbud Myntri Rangbah ka Jylla u Bah Sniawbhalang Dhar ban tuklar lem na ka bynta ban pyllait ia ka pisa kaba T.50 klur kum ka advance na ka bhah khajna ne royalty na ki marpoh khyndew kiba heh bad ba rit (major & minor minerals) khnang ban lah ban pynkhuid ia ka tulop ba sahteng 12 bnai jong ki MDC, Ophisar bad ki staff jong ka Council.

Ha ka shithi sha u Symbud Myntri Rangbah, u Ma Thombor u la pynpaw ka jingsngew nguh halor ka jingshim ia ka sienjam ban pyllait ia ka pisa kaba T.13.80 klur na ka khajna ki marpoh khyndew (Major Minerals) sha kane ka Council.

“Ha kaba iadei bad kane, Nga kwah ban pyntip sha phi ba kane ka pisa ba la pyllait da ka sorkar kam pat biang satia ban pynkhuid ia ka tulop ba dang sahteng jong ki nongtrei ka Council,” u la ong.

U pyntip ba ia ka tulop jong ki ophisar bad ki staff la dep ban pynkhuid haduh u bnai Rymphang 2024, katba ia ka tulop jong ki MDC ki pensioner bad ki longiing ba ioh pension la pynkhuid haduh u bnai Kyllalyngkot 2024.

“Kumta ka tulop kaba dang sahteng ia kaba donkam ban pynkhuid noh da ka Executive Committee ka long ia ka tulop ba sahteng jong ki ophisar bad ki staff naduh u bnai Lber 2024 haduh u Rymphang 2025, katba ka tulop ba sahteng jong ki MDC, Pensioner bad ki longiing ba ioh pension ka long naduh u bnai Rymphang 2024 haduh u Rymphang 2025,” u la ong.

“Halor kine ki jingshisha ba la kdew haneng, khnang ban pynlah ia ka Executive Committee ba kan pynkhuid noh ia kine ki tulop baroh kiba dang sahteng hashwa ka jingpynlong ia ka elekshon MDC 2025, na ka bynta ka Executive Committee ngi kyrpad ban sngewbha ban pyllait ia kane ka song pisa kaba T.50 klur kum ka advance bad ban pynbeit na ka bhah jong ki marpoh khyndew kynthup (Major bad Minor Minerals) bad ka khajna na ki kali ba la lum hapdeng jong u snem 2024-25,” ong u Ma Thombor.

“Namar kata, ngam don lad da kumwei pat hynrei ban leit sha ka ophis jong phi bad kyrpad ban pyllait ia kane ka pisa ba la kdew haneng kloi katba lah khnang ban pynlah ia ka Council ba kan pynkhuid ia baroh ki tulop kiba dang sahteng,” u la bynrap.