Kyrhuh ka JYF ban iakhih lada ym ioh Ambulance ha War Jaintia

Syllad | The Rising MeghalayaApril 26, 2020

Ka Jaintia Youth Federation kala kyrhuh kum u laren ban iakhih paidbah lada ka War Jaintia kam ioh Ambulance.

Ha u kyrwoh bala phah da u Songkiman Ryngksai, Organising Secretary ka JYF central body ula pynpaw “Ka JYF ka dawa na ka sorkar jylla ban buh ia ka kali ambulance 108 kawei na ki 25 tylli kiba ka sorkar jylla ka dang shu dep thied na ka CM Relief for COVID-19 fund hapoh ka thain War Jaintia.”

 “Lada ka sorkar jylla kam sngap ia kane ka jingdawa, ka seng kan sa pynlong da ka jingiakhih ban pynbor ia ka sorkar ba kan pynurlong iaka jingdawa paidbah ka thain War Jaintia,” ong u kyrwoh ka JYF..

Ka JYF kala buh jingkylli ruh ia ka sorkar jylla ba balei ka da hap ap haduh kane ka por ba mad jingeh ki paidbah ban khohreh ban pynbiang ambulance ia ki paidbah, kata ruh da ka CM Relief Fund. Kala kynthoh shuh shuh iaka sorkar ba kane ka jingthied ia kine ki ambulance da kane ka pisa ba synniang, ka paw shai baka sorkar ka tlot bad kala dei ban pynbiang naduh b aka sorkar kala wan haka bor.

Kala pynkynmaw ruh ba mynshuwa kane ka kali 108 kala don hapoh ka thain War Jaintia, hynrei kaba lyngngoh kane ka kali kala shu jah bad kam lah ban ai jingshakri ia u paidbah ka thain War Jaintia.

Ka JYF ka phah iaka khubor sha ka sorkar Jylla ba kam dei ban khein sting ha kaba iadei bad ka koit ka khiah bad ka dei ban pynbiang salonsar iaka jingdonkam ka tnad ka koit ka khiah.