Kyrmen ka Shillong Lajong ban jop hattrick ha ka jingiakhun pyrshah ia ka TRAU

Syllad | The Rising MeghalayaNovember 25, 2023

Ka Shillong Lajong FC ka don ka jingkyrmen kaba skhem ba kan ioh khur biang ia ka jingjop kaba laisien kynthih (hattrick) hadien ba kan iakhun biang pyrshah ia ka TRAU FC haka 25 tarik Naiwieng, ha madan SSA Stadium, Shillong ha ka por 2 baje nohphai sngi.

Ka TRAU FC kam pat shym la ioh satia shisien ruh ia ka jingjop ha kane ka jingialehkai I-League jong kane ka samoi ha kaba haduh mynta ka la ioh tang shi point lyngba kawei ka jingiakhaid bad shah rem ha ki san tylli ki jingialehkai bad don ha ka thup kaba shatrai eh ha ka miej khein point.

Haba kren sha ki lad pathai khubor shwa katei ka jingialehkai, u head coach ka TRAU u L. Nandakumar Singh u la ong ba kum ka kynhun kan hap ban iakhun tyngeh lada ki kwah ban poi sha ka thong pyrshah ia kynhun ba khlain ka Lajong, kata da kaba pyrto ia ki nongkyrshan trai shnong na ka bynta ka kynhun ka jong ki.

Katba ka Lajong FC hadien ka jingjop kaba arsien kynthih ka la ioh ban khur 9 point bad mynta ka don ha ka kyrdan kaba 5 ha ka jingioh point lyngba ki artylli ki jingjop bad lai ka jingiakhaid ha ki santylli ki jingialehkai.

Ha ka jingkren sha ki lad pathai khubor hynne ka sngi u head coach ka Lajong FC u Bah Bobby L Nongbet u la pynpaw ba u sngewkmen shibun na ka bynta ka kynhun hadien ki artylli ki jingjop kiba arsien kynthih bad ban bteng ia kane ka jingiakhun kaba mynta da kaba ym shim sting pyrshah ia ka TRAU FC ha ka jingialehkai ka ban long haka sngi Saitjain (25 tarik Naiwieng).

U la ong ruh ba ka Lajong ka khmih lynti ia ka jingjop kaba lai sien lynter hadien kane ka jingiakhun pyrshah ia ka TRAU ka ban iakhun dohiap na ka bynta ka jingjop kaba nyngkong ha kane ka lympung ialehkai.