Kyrmen ki paidbah ba ka skul Mynken kan ioh rah ia ka nam lahduh ha ka final jong ka Subroto Cup

Syllad | The Rising MeghalayaSeptember 11, 2024

Ki paidbah ka Jylla khamtam kito ki riew ieit phutbol ki la pynkhreh ban ap kmang ia ka skul Mynken Christian Higher secondary School ba kan ioh rah ia ka nam lahduh ha ka final jong ka lympung ialehkai  U-17 Subroto Cup International Football ka ban long mynta ka 11 tarik Nailur ha nongbah  Delhi.

Haba phaidien sha ka lynti iaid jong ka skul Mynken ha kane ka lympung ialehkai, ha kaba sdang eh, ia kane ka skul na kane ka jylla la pyniakap (draw) ia ka ha ka Group F ba don ki skul jong ka jylla Bihar,  Dadra and Nagar Haveli and Daman and Diu, bad  ka Chandigarh.

Ha kane ka kynti, ka Mynken Christian ha ka jingialehkai sdang ka la lah ba kan pynpaw ia ka jinglong ba tbit bad ba khlain bha ka jong ka ha kane ka lympung da ka jingjop kaba long da 23-0 pyrshah ia ka Daman & Diu.

Ha ka jingiakhun kaba bud, ka Myngken pat ka la  mad ia ka jingiakhun kaba iatan bha  na ka kynhun Chandigarh, kaba bat ruh ia ka  nam kum ka lahduh jng u snem ba la dep, hynrei ki player ka Myngken ki la lah ban jop da 1-0.

Ha ka jingiakhun kaba lai bad ba khatduh ha ka group, ki player ka Mynken Christian ki la jop da 5-0 ia ka skul kaba dei na Bihar.

Kumta ha kaba kut jong ka jingiakhun ha ka group, ki player jong ka Mynken Christian ki la lah ba kin thep haduh 29 tylli ki kol.           

Lada dei ba buddien bad sakhi ia ka jingiakhun ka Myngken Christian ha kane ka lympung mynta ka kynti, ka rukom ialehkai ne ka formation jong ka team hi ka long 4:3:3.

Kum ka kynhun, mynta ka kynti ka Mynken Christian ka don ruh ia ki player kiba lam kynsai bad kiba tbit bha lada shim klyllum naduh u nongap kol, ki defender, ka midfield bad kumjuh ki striker.

Ha kane ka kynti, ia ka Mynken Christian la mihkhmat da Wanpli Malang, Bipiush G Marak , Richborn Kharpuri, Pynshailang L Nonglait, Erickson Pamsad, Saindur Rynjah, Franky Dkhar, Banpliebok Khongjoh, Alicestar Thangkhiew, Banganson Nongphlang , Mebanlamlynti Masharing, Samepaia Thangkhiew, Mebankhraw Nongrum, Andrewson Marbaniang, Precious Stone Nongsiej, Mebatskhem Shylla, ia kaba la coach pat ia ka da u bah Kitborlang Kharlukhi bad Manager ka kynhun dei u bah Carmelius Ramshon bad khlem da klet ba u bah Bobby L Nongbet ba dei u District Sports Officer ka Ri Bhoi u don lang ha syndah bad kane ka kynhun naduh kaba sdang.

Pynban haba kynjoh sha ka kyrdan iakhun ka quarterfinal, ka kynhun ialehkai jong ka Myngken Christian ki la lah ban pynliem ia ka CISCE (Minerva Punjab) da 3-1.

Hynrei ha ka por ba la iakhun pat ia ka semifinal kaba la long ha ka 9 tarik Nailur, ka la kylla pongpet shisha kane ka lympung iakhun, namar ka kynhun ialehkai ka Mynken Christian ki la lah ba kin jop kput da 7-0 ia ka ki khynnah skul ka jylla Arunachal Pradesh.

Haba iakren bad uwei na ki football coach u bym kwah ban pynpaw kyrteng hynrei uba la buddien bha ia kane ka lympung jong ka Subroto Cup u pynpaw ba mynta pat ka snem, kane ka lympung ka da hiar bha, namar naduh ka por ba la pyniakap,  don ka  group, kiba don ki skul jong ki jylla kiba khlain bad ba paw nam, hynrei don pat ki group kiba lehse ki skul ba la ioh ban ia aireng kim lah satia ban kot ia ka kyrdan iakhun jong ka District Level Subroto Cup ba pynlong da ka tnat sports hangne ha Meghalaya.

Haba phai pat sha ka jingiakhun final ka ban long mynta ka sngi na ka rukom bad ka sur ialehkai kaba paw shynna bha, ka Mynken Christian HSS lah ban ong ba kan long ka kynhun kaban khreh ban wanphai sha la iing bad ka nam jop, tangba kan shong eh haduh katno ki khynnah skul ka jylla Manipur kin ialehkai, namar hap ban kynmmaw ba ha ka jingiakhun ia ka phainal tang shi khyllipmat ka jingbakla ka lah ban ktah ia ka kynhun.

Nalor katta kaba donkam eh ban shem bad iohi ba ki player ba shakhmat ka Mynken Christian HSS ki donkam ban leh ia la ka jong ka kamram bad katta hi ka long ba katba lah kloi ban ialeh ban pynkhih ia ka jar ne ban thep ia ka kol na ka kabu ksiar ba wan sha ki.

Lah ban pynkynmaw ba ha ka U-15 ka Meghalaya lyngba ka Nongjri Presbyterian ka la wanphai sha la iing bad ka nam jop na kane ka lympung bad lada jia ba jop lei lei sa ka Mynken Christian, kan long ka rekod ban sah nam ha kane ka lympung jong ka Subroto cup ba  ki artylli ki skul jong kawei ka jylla ban wanphai sha la iing bad ka nam jop.