Kyrmen u Conrad ba ka sorkar kmie kan pynkhreh noh iaka MoU ban pynbeit ia pud u sam

Syllad | The Rising MeghalayaMarch 7, 2022

U Myntri Rangbah ka jylla u Conrad K. Sangma ula pynpaw ia ka jingkyrmen ba ka sorkar kmie kan shim khia ba kan pynkhreh ia ka soskular ne ia katta ka MoU haba iadei bad ka kam ia pynbeit ia u pud u sam bad ka jylla Assam khnang ban lah ban ia kren bad ban ia pynbeit noh shwa ia ki 6 napdeng ki 12 tylli ki jaka ha ka jingialang kaban long ha ka 9 tarik mynta u bnai ha nongbah Delhi.

Haba pynshai ia kane ka mat hapoh ka ïing dorbar haka sngi Nyngkong, na ka liang u Conrad u pyntip ba u Myntri kam pohiing ka ri u Amit Shah u la phah wan ia u Myntri Rangbah ka Assam bad ka Meghalaya ha ka 9 tarik mynta u bnai sha nongbah Delhi, ban iakren bad ia pynbeit khatduh ia ka Mou ban ia soi hapdeng kine ki artylli ki jylla.

Kat kum ka MoU, ki baroh ar ki sorkar jylla kim dei shuh ban dang pynmih tam palat ia ki 12 tylli ki jaka ba don ka jingiapher ne ia kajia u pud u sam kiba kynthup iaka . 1. Tarabari, 2. Gizang, 3. Hahim, 4. Langpih 5. Borduar, 6. Boklapara, 7. Nongwah-Mawtamur 8. Khanapara-Pillangkata, 9. Deshdoomreah, 10. Block-I & Block-II, 11. Psiar bad Khanduli bad 12. Ratacherra.

Ki hynriew tylli ki jaka kiba la khreh ban ia kren bad ban ia pynbeit ha kane ka kynti ba mynta ka kynthup ia ka  Tarabari (4.69 sq km), Gizang (13.53 sq km), Hahim (3.51 sq km), Boklapara (1.57 sq kms), Khanapara-Pilangkata (2.29 sq kms) and Ratacherra (11.20 sq kms).

Shuh shuh u Conrad u pyntip ba na ki 36 tylli ki shnong ba la kam da ka Meghalaya ha u snem 2011, 30 tylli na ki la sngewthuh  ba la ailad ia ki ba kin hap hapoh u pud u sam jong ka Meghalaya.

Haba batai kham  bniah , u Conrad u iathuh ba ha West Khasi baroh 8 tylli ki shnong ha Tarabari katba ar na ki lai tylli ki shnong ka Gizangbad 11 na ki 12 tylli ki shnong ha hahim kin wan  ne hap noh sha ka jylla Meghalaya.

Haba phai pat sha ri Bhoi u Conrad u pyntip ba kawei na ki artylli ki shnong  Boklapara, 5 na ki 6 tylli ki shnong ha Khanapara-Pilangkata bad 3 na ki 5 tylli ki shnong ha Ratacherra ha East Jaintia Hills kin iai neh ne don beit bd ka jylla.

U Conrad u iathuh ba ia kine baroh ki 6 tylli ki jaka ba la lah ban ia poi noh sha ka jingpynbeit bad ruh da ka jingpyndonkam ia ki kor ki bor ryngkat ka jingiatreilang bad ka shnat treikam Survey of India  ba la sakhi lang da ki dkhot jong baroh artylli ki jylla.

“Haba shim kyllum kumba  36.79 sq kms ha kine ki hynriew tylli ki jaka, kumba 18sq kms tam ne duna ka jaka kan wan sha Meghalaya bad sa kumba 18 sq kms part kan leit noh sha Assam,”la iathuh u Conrad.