Kyrpad ka Central Puja Committee ban plie biang ia ka krem Mawjymbuin na ka bynta ka jingleh niam

Syllad | The Rising MeghalayaJanuary 4, 2025

Ka Central Puja Committee (CPC), Meghalaya ha ka 3 tarik Kyllalyngkot ka la thoh sha ka Deputy Commissioner ka East Khasi Hills District da kaba buh ia ka jingkyrpad na ka bynta ban plie biang ia ka krem Mawjymbuin na ka bynta ki nongleh niam ha u bnai “Shravana” (Jylliew – Naitung 2025).

Ka CPC ka la pynpaw ba ka jingplie biang ia kane ka krem Mawjymbuin ka long ban pynbna ia kane ka krem kum ka ‘Religious Tourist Spot’ ne ka jaka jngohkai bad lehniam ka ban khring ia ki nongwan jngohkai na ki kynhun niam bapher bapher na kylleng ka pyrthei.

Katkum ka CPC, kane ka krem ka dei kaba la tip kum ka ‘Religious Tourist Place’ bad ha u snem 2002 palat 200 ngut ki riewngeit ISKCON na kylleng ka pyrthei ki la wan sha Shillong bad ki la pyndep ia ka jingleh niam ha kane ka Krem.

La bynrap ruh ba ka CPC ka la peit halor ka jingpynneh ia ka jingkhuid hapoh bad sawdong jong kane ka krem.

Ka CPC ka la ai jingmut ruh ban thaw ia ki kyndon kiba pyrkhing bha ban khmih ha kaba iadei bad ki jingleh niam hapoh kane ka Krem baroh shisnem khamtam ha ki sawtylli ki Sngi U Trai ha u bnai “Shravana” (Jylliew-Naitung) bad ban don ki volunteer ki ban iarap ia ki nongialam shnong bad ia ka Dorbar Shnong jong ka thain.