Kyrpad ka dorbar shnong Lapangap ia u DC West Jaintia Hills ban buh ktem Pulit ha Lapangap

Syllad | The Rising MeghalayaAugust 28, 2023

Ka dorbar shnong Lapangap haka sngi Nyngkong kala kyrpad iaka bor synshar district ban buh iaka ktem pulit haka shnong Lapangap haka jaka kaba la tip kum ka Lum Moopyrdet Pynthor Lapangap ban shngain u nongshong shnong.

Kane ka jingdawa ka dorbar shnong ban buh ktem pulit ka dei hadien ka jingshah pyndik naka por sha ka por ha ki pulit Assam bad ki paid Karbi ha ki jaka rep jaka riang.

Kumban shu pynkynmaw ba haka sngi Saitjain ka taiew kaba la dep, ki pulit jong ka Jylla ruh kila thombor ha ki paid Karbi bad kila hap ban kynran dien hadien ka jingshah lun maw bad shah siat da ki jri siat sim na ka jingiakam mar kylliang iaka jaka hapdeng u Karbi bad ki nong Lapangap.

Katkum ka dorkhat kaba ai ka dorbar shnong Lapangap sha u Deputy Commissioner, West Jaintia Hills bah BS Sohliya ka ong “Ngi kyrpad rit ia phi ban iarap ia ngi daka ba buh ia ka Police Battalion hakane ka jaka ia khajia khnang ban iada na kano kano ka jingjia ba sngewsiih bad ban don ka shnongsuk shnong shngain ha ka shnong ka thaw jong ngi.”

Ka dorbar shnong ka kyrpad ruh ia u DC ban iakren bad ka sorkar Assam ban kynriah noh shisyndon ia ka Assam Police/Battalion Camp kala buh dangshen, kata 26 tarik Nailar ban shngain ki paidbah nongrep ban leit rep riang ha kane ka jaka.

Ka dorbar shnong kala ong ruh ba ka jingdon kane ka camp pulit ki Assam kala ai nang pynioh bor iaki Karbi ban pynjot pynpra ia ki tynrai dieng ba la thung da ka shnong bad ban klun ia ki jaka rep jaka riang, bad ki hali pynthor kiba hap hapoh u pud u sam ka shnong Lapangap.

Ka Dorbar Shnong Lapangap kala iathuh ruh iaka jingjia shah jynrat ki dieng kiba la thung ha katei ka jaka, kata haka 12 tarik July 2023 ha ka por 12:00 Pm bad ha ka 18 August, 2023 ha ka por 1:00 Pm. La iathuh ba ki Police Assam bad ki paidbah nong Karbi ki la wan ban leh bor bad pynjot pynpra ia ki dieng kumba 5000 tylli ki tynrai dieng ba la thung daka shnong Lapangap ha u lum jong ka shnong u ba kyrteng U Lum Moo Pyrdet Pynthor Lapangap, Elaka Shilliang Myntang, West Jaintia Hills District, Meghalaya. Kine ki tynrai dieng ki dei kiba la ai da ka Meghalaya Basin Development Authority naka JICA  lyngba ka offfice jong u Deputy Commissioner.