Kyrpad ka EJNC na u Myntri Pule Puthi ban map mar shiteng ka bai skul

Syllad | The Rising MeghalayaSeptember 7, 2021

Ka EJNC-Khliehriat circle haka sngi Nyngkong kala ai da ka dorkhat sha u Myntri Pule Puthi ka Jylla ban kyrpad ia u ban shimkhia ban iarap iaki khynnah skul da kaba map marshiteng iaka bai skul namar ka jinghiran haka ioh ka kot ki kmie ki kpa khamtam kiba im da kaba bylla sngi naduh bala wan lynsher ka jngpang khlam COVID-19.

Ia kane ka dorkhat ki nongialam ka EJNC haka jingialam u Synjoy Bareh president ryngkat u general secretary EJNC Khliehriat Mebanteilang Sukhlain kila leit ban aiti ha u Deputy Commissioner, East Jaintia Hills E Kharmaliki.

“Ngi kyrpad ban map noh mar shitieng ka bai skul hapoh ka district namar naduh ba la wan lyngshop ka jingpang khlam COVID-19 kala ktah lut ia ka kamai kajih jong ki kmie ki kpa khamtam ia kito kiba shaniah tang na ka bylla sngi,” la ong ka EJNC haka dorkhat sha u myntri.

Ka EJNC kala iathuh iaka jingeh ki kmie ki kpa jong ki khynnah skul naduh u snem 2020 haduh mynta ki kmie ki kpa jong ki khynnah skul kiba im tang da kaba bylla sngi kila hap ban im iaka jingim hapdeng ka jngsyrtok namar ba kila shah ktah haka kamai ka kajih bad kila shem jingeh ban pynbiang iaka bam ka dih bad ka bai skul. Ka EJNC kala kyrpad u myntri ban tuklar ban pynjem iaka jingeh ki kmie ki kpa.

Ka EJNC kala ai ka jingiaroh ia ki bor pyniaid jong ki skul bad ki nonghikai kiba la ialeh shitom ban pynbiang bad sam jingnang jingstad sha ki khynnah online, hynrei ka jingeh kaba iakynduh ki kmie ki kpa pat kalong ba ki hap ban pynbiang iaki laptop ki mobile ba rem bad ka internet.

Ha kaba iadei bad ka online klas ruh ka EJNC kala dawa ruh naka sorkar ban pynbiang iaki network sha baroh ki shnong nongkyndong ha East Jaintia Hills namar ba kiba bun ki khynnah kila shah ktah haka pule puthi jong ki.

Ka EJNC kala ban jur ia u myntri ban shimkhia ban iarap bad ban pynbeit iaka rukom siew bai skul ki khynnah khnang ban iabit iabiang lang salonsar.