Kyrpad ka Jylla ia ka Sorkar Pdeng ba kan bteng biang ia ka BAD Programme ha ka Jylla

Syllad | The Rising MeghalayaFebruary 11, 2025

U Myntri ka Tnad Border Area Development u Rakkam A Sangma ha ka 10 tarik Rymphang u la ong ba ka sorkar Jylla ka la thoh sha ka sorkar Pdeng ban kyrpad na ka bynta ban bteng biang ia ka Border Area Development Programme ha ka Jylla.

Haba kren sha ki lad pathai khubor, u Rakkam u la ong ba ka BAD Programme ka dei kaba la treikam mynta la bun bun snem, hynrei naduh u snem 2021 ter ter, ia kane ka prokram la pynsangeh noh da ka sorkar India.

“Ngi la phah da ka jingthoh bad kyrpad ia ka sorkar India ba kan pyrkhat biang halor ka rai na ka bynta ban bteng biang ia kane kajuh ka prokram,” u la ong.

U la ong ruh ba kane ka prokram ka la iarap bha ban kyntiew ha kaba iadei bad ki jingtei ha ki thain khappud, kata la ka long ha ka liang ki iingskul, ki hospital, ki surok, bad ki jingkieng.

U la ong ba mynta ka inter-state programme na ka bynta ban shna ia ki surok, ki iingdorbar shnong, ki iingskul bad kiwei kiwei ki dang iai bteng.

Haba kylli, u Rakkam u la ong, “Ka dei ka prokram jong ka sorkar India. Ka dei kaba iabhah 90:10 ka jingpynlut. La pynsangeh noh ia ka namar kiba bun ki daw. Ngi la aijingthoh sha ka sorkar India bad ngi la kyrpad ba kan sdang biang ia kane ka prokram.”

Ha kajuh ka por une u Myntri u la pynpaw ruh ba ka scholarship na ka bynta ki khynnah pule jong ki shnong khappud kan dang iai bteng beit kumba ka long.