Kyrpad ka synjuk Muster Roll ban pynshitom ia kiba shimkabu die marbam

Syllad | The Rising MeghalayaApril 25, 2020

Ka All Jaiñtia Muster Roll Workers & Labour Union (AJMRWLU), ka pynpaw ïa ka jingsngewnguh ïa u Conrad K Sangma u Myntri Rangbah ka sorkar jylla halor ka jingshimkhia ka sorkar ban pyllait ïa ka bainong sngi ki nongtrei muster roll ha kaba ki tnat sorkar ki la siew sha la ki jong ki nongtrei muster roll.

Kane ka synjuk kala pynpaw ïa ka jingsngewnguh ïa u Bah P Tynsong u symbud Myntri Rangbah ka sorkar jylla ïa u Bah DP Wahlang Principal Secretary cum chairman ka MBOCWB halor ka jingpyllait ïa ka jingïarap kyrshan pisa sha ki dkhot ka board, ha kaba la bun ki dkhot kiba la ïoh jingiarap shi katdei eh ha kane ka por ba ki shem jingeh.

Mynta ka sorkar jylla ka la sdang ban ai hukum ban tehlakam ïa ka jingkiewdor jong ki marbam mardih ha ki dukan ha ïew die lang bad ïew die khutia ha ka jylla bad halor kane ruh ka synjuk jong ki Muster Roll ka pynpaw ka jingsngewnguh ruh ïaka bor synshar district jong ka East bad West Jaintia naduh u Deputy Commissioner bad Superintendent of Police kiba la shim khia ban pyntreikam ïa ka hukum ka sorkar hapoh district. 

Hadien ba ka sorkar ka la hukum ban ïashong khop ha ïing ban iada na ka jingpur u khniang Coronavirus, ka jingkiewdor ki marbam mardih kala ktah jur bha ïa kiba bylla sngi naduh kiba trei muster roll kiba ïoh bai bylla ar lai sien ha  ka shisnem hadien ba la dep trei, ka ktah ruh īa ki nongrep bad haduh kito ki nong bylla kiba tlot ba kyrduh ba kordit.

Mynta kane ka synjuk ka kyrmen ba ka ka sorkar jylla kan leh tyngeh da kaba pyntreikam ka aiñ Essential commodities act 1955 ban pynshitom ia kiba shim kabu ban pynkiewdor shaba palat ïa ka dor ki marbam mardih. Kane ka hukum jong ka sorkar jylla ban pynshitom kala mynsiem bha iaki nongtrei bylla kiba im na kti ha ktien.

Ha ka juh ka por ka synjuk ki Muster Roll ka kyrpad ia u Myntri Rangbah ka jylla bad ïa baroh ki Myntri ka sorkar ba kin sngewbha ban ïa pyrkhat lem ruh na ka bynta kiba nongshet ja sngi ha ki school lyngba ka Mid-day meal scheme bad ïa ki nongbylla sngi kiba ym don ration card, khnang ba kin ïoh ka jingïarap kum u khaw bad kiwei ki marbam kumba ïoh lem kiwei pat ki nongshong shnong  na ki dukan ration ne ki fair price shop hapoh shnong bad la banjur ia ka sorkar ban phai lem ki khmat sha ki jingeh ba ki iakynduh khamtam ba kim ioh tulop mynta la 6 bnai lynter.

Kane ka synjuk ka khmih lynti ba da kane ka hukum ka sorkar jylla na ka bynta ban tehlakam ïa ki marbam ha iew ha hat ka dei ban treikam ruh hadien ba la kut kane ka lockdown ruh.

Ka synjuk ka pynrem jur ruh ïa baroh kito ki riew khawpud kiba jrong kti ban pynmynsaw ïa ki doctor, ki nurse, ki Police, ki Home guard bad kiwei kiwei ki nong shakri sorkar kiba ïaleh ban trei borbah ban iakhunn pyrshah ïa u khniang COVID 19 ha ka Ri India baroh kawei.

Ka synjuk ki Muster Roll ka buh haka jingduwai bad kitbok kitrwiang ia abroh kiba ioh ïa u khniang COVID 19, ba kin ïoh bor ioh iaka maet kaba koit kaba khiah.