Kyrpad ka synjuk pynkhuid wah Myntdu na u DC Jowai ban pynjari da ka 144 CrPC ban khang saitkali, tih maw tih shyiap

Syllad | The Rising MeghalayaFebruary 22, 2021

Ka seng ‘Khooid ya ka wah Myntdu’ kala rai ban kyrpad na u Deputy Commissioner, West Jaintia Hills District ban pynjari da ka kyndon aiñ 144 jong ka CrPC ban khang pyrshah ia ki briew ban tih shyiap, tih maw, sait kali, saitjaiñ, ban iaid ki kali kit maw kit shyiap, ban pyniaid jakhlia na ki paiñkhana, pyntuid jakhlia sha ka Wah Myntdu.

Ia kane ka rai ka Khooid ya ka wah Myntdu kala shim haka jingialang kaba long hadpeng ki waheh chnong, nongkitkam shnong, ki seng samla shnong, ki seng nongrep ki ba don ha talwiar ka Wah Myntdu ha ryngkat ki executive members Khooid ya ka Wah Myntdu, kaba la long ha ka 20/02/2021 ha ïungwalieh ka Tpep Pale Dorbar Chnong, Jowai.

Ia kane ka jingialang la pyniaid da u Ma Khroo L Pariat president Khooid ya ka wah Myntdu, la ioh jingkren ruh na u Ma Army Lipon vice president, ka report treikam na u Ma Dapherborn N Suchiang general secretary Khooid yaka Wah Myntdu.

Ha kane ka sngi la pyni haka pyrda (screen) ia ki dur ba la shon ha Wah Myntdu naduh na surok Jowai Bypass Mihmyntdu, ka surok Jowai Bypass haduh ha Khlieh kai Ksoo, Ïalong.

Ha kane ka Dorbar la ioh jingkren na ki waheh chnong, ki nongkitkam shnong, ki samla, ki longkmie,kiba la pynsngew ia i jingdiaw mynsiem ha ba iohi ia ki daw na ka jingleh jakhlia ki nongshong ha talwiar ka Waheh Myntdu khamtam ha u pud u sam ka Jowai

Ha kane dorbar la shim iaki rai ba naduh ka 01/03/2021 ka seng Khooid ya ka Wah Myntdu kan leit pynsngewthuh sha baroh ki dorbar shnong bapher bapher ki ba don ha talwiar ka Wah Myntdu na ka bynta ban leh ia ka ba donkam ban leh bha ban khuid ka wah Myntdu ban lah ban ia im bha im suk man ka sngi.

Ban im ki dohum dopnat ha Wah Myntdu, la rai ha ka dorbar ban ai jingthoh sha ka JHADC ka ba dei ka bor ban peit ban iada ia ki wah ki um, ban ai bor ia ki dorbar shnong lyngba ki waheh chnong khnang ba kin lah ban tong ia u shyiap na Wah Myntdu ha la u pud u sam jong la ki shnong.

Ka JHADC ka dei ban khang pyrshah ban pom pathar ia ki dieng ha rud ka Wah Myntdu, bad ban tih maw tih shyiap na rud ka Wah Myntdu.

La rai ba ha u bnai Iaiong (April) 2021 yn pynlong ia ka jingpynkhuid ia ki rud ki nala da ki dorbar shnong ha la u pud u sam ki shnong ki thaw.

Ka Khooid ya ka Wah Myntdu kan kynthup lang ha kane ka jingialeh ban pynlong iaka wah Myntdu kaba khuid bad ka Mynkjai ka ba dei ka jaka bret ñuit ka JHADC bad ki Jowai Municipal Board (JMB) kiba mih na sor Jowai bad na ki iew ki hat.

Nalor kata ban pynneh pynbha pynitynnad ia ka Wah Myntdu, kala pynkhreh ban pynlong ka jingiakren bad ki nongialam skul kiba don ha talwiar ka Wah Myntdu, khnang ba ki khynnah kin tip shaphang Ka Wah Myntdu lyngba ki Environmental Studies ha ki skul.

Ka Khooid yaka Wah Myntdu kala kyntu iaki paidbah nongshong shnong ban iakhun iaki jaboh plastic, ban shna bha ia ki septic tank, ban leh khooid ia ki rud ki nala ban lait ban tuid ki jaboh ki um jakhlia na ki iing sha ka Wah Myntdu.