Kyrpad ka WJSU ya kiwa yah trok ha War Jaintia wow syndong damiat wei burom ya kiwi

Syllad | The Rising MeghalayaFebruary 3, 2024

Ka War Jaintia Students Union (WJSU) dei sniawkhia yei chngain I lai I wan iong ki paidbah wa chong chnong ka thain War Jaintia khamatam ki chnong wa em ha chilynter ka sarok Amlari-Nongtalang-Tamabil da kyrpad ko ya ka War Jaintia Trucks Owner & Drivers Association (WJTO&DA) wow yakrehlang ko hei wow chngain I lai I wan wei lait u em I khynniah khynrah wei wit thut ka luti syngkein neidaw wym em I bood ryntih iong ki nongyah truck ya ki adong wa dabooh.

Ha ka chithi wa da thoh cha ka sein kiwa yah truck (WJTO&DA) da ong wa kat kam i ood i nam wa daioh na kiwa boon walang wa chong wasah ha chilynter u sarok Amlari-Nongtalang-Tamabil wa kiwa yah trok (Driver) kit moo cha Tamabil tang wa biang ya ki ym em u pyrkhat de ki ya kiwi ki paidbah walai wa wan.

Chooh chooh neiliang ka War Jaintia Students Union kyrpad ko ya ka sein kiwa yah trok wow chimkhia ki u klam, pynsniawthuh ya kiwa yah trok wym toh u jhan u sya hawa lai nae u pynsangeh, pynyien ya ki kari iongki kat cha waioh hadien wa da dep thap Moo khlem da pyrkhat de ya kiwi kiwa lai wa wan ha chilynter ka sarok.

Kamtae iow man I lai I wan ki kari ha chilynter ka sarok Amlari-Nongtalang-Tamabil iwa lait liang wei lait nei wit I thut nae blok neitae iow lait u mih iwon iwon I jia wa sniawsih ya ki paidbah walai wa wan ha sarok, ka Sein kyrpad joor ko ya ki yahkhmat ka War Jaintia Trucks Owner & Driver Association (WJTO&DA) wow chmkhia u boodien yeini I dawa ka Sein neibynta I miat I bha ionglang.