Kyrpad kyrpon ka Seng Khasi na U Nongbuh Nongthaw ha u Lum Sohpetbneng ban ïada na ka jingpang Coronavirus

Syllad | The Rising MeghalayaMarch 26, 2020

Kumba ka Sorkar Kmie ka la pynbna ia ka jingkhang khyrdep ia ki bynta jong baroh kawei ka Ri kum ban ia leh pyrshah ia ka jingsaphriang jong u khniang jingpang covid-19 haduh ka 14 tarik u Iaiong,2020, ka Seng Khasi Kmie, sa shisien pat, ka kyrpad ia baroh ki tnat Seng Khasi ha kylleng ka Bri Hynñiewtrep ban bud ryntih ia ka jingbthah bad ki adong adit jong ka Sorkar Kmie bad kumjuh ruh jong ka Sorkar Jylla khnang ba ngin lah ban pynduh jat ia une u khniang jingpang Coronavirus, uba long kum ka khlam, uba la ktah jur ia baroh kawei ka pyrthei. Kumta la kyntu ba dei ban pysangeh ne pynjlan shuwa ia baroh ki prokram ia lum paidbah kiba long ha kano kano ka rukom ha kylleng jong ki tnat Seng Khasi.

Shuh shuh, na ka liang jong ka Seng Khasi Kmie, ka pynbna ruh, ba ka Seng ka la shim ia ka bynta ban buh ka kyrpad kyrpon ha U Blei Trai Kynrad, Nongbuh Nongthaw ban un pyllait ia ka Bri Hynñiewtrep, Hynñiewskum na ka jingwan jong kane ka khlam ka ngoh da kaba pynlong ka nguh ka dem blei ha u Lum Sohpetbneng uba kyntang jong ka jaidbynriew ha ka 24 tarik u Lber, 2020.

Ha kane ka sngi, na ka liang jong ka Kynhun ki Tymmen ki San jong ka Seng Khasi Kmie, kata u Rgh. Skor Jala bad u Rgh. Donbokstar Kurkalang ki la pyndep ia ka jinglehniam ha ryngkat ka jingiadon lang jong u President rangbah ka Seng, Rgh. D.K. Dkhar bad u Lamphang ka Lum Sohpetbneng Komiti, Rgh. Dipshon L. Nongbri. Ki tymmen ki san ki la khot bad pyrta ryngkat bad ka duwai ka phirat, ka kyrpad ka kyrpon ia ki Ryngkew ki Basa jong ka Ri Hynñiewtrep, Hynñiawwasa ba kin da ki ker ia baroh ki kur ki kha kiba don ha la ka jong ka Ri bad shabar ruh kumjuh.

Ki la buh lang ruh ka jingduwai na ka bynta jong baroh ki bynriew kiba shong ba sah ha kane ka pyrthei ba kin lait noh na ka jingma jong kane ka khlam ka ngoh.