Kyrpad u CM ia ka jingkyrshan ki paidbah halor ka jingjia shah pynjulor na ka jingshlei um

Syllad | The Rising MeghalayaOctober 13, 2024

U Myntri Rangbah ka Jylla u Conrad K Sangma u la pynbna ia ka jingkyrpad jingiarap noh synniang na ki paidbah nongshong shnong ka Jylla na ka bynta ban aijingiarap sha kito ki lanot kiba la shah ktah na ka jingshah pynjulor ba dang shen ha ka jingshlei um ba shyrkhei kaba la ktah jur khamtam ia ka Rilum Garo.

Kane ka jingshlei um ka la ktah jur ia kiba bun bah ki longiing longsem, ka jingshah pynjulor jong kiba bun bah ki iing ki sem ki jingri jingdup, ki jingthung jingtep bad kiwei kiwei. Napdeng ki khatwei tylli ki district jong ka Jylla Meghalaya, ka West Garo Hills bad ka South Garo Hills ki dei kiba la shah shah jur ha kane ka jingshah pynjulor ha ki bor ka mariang, kata kaba la shim ruh ia ka jingim jong ki 17 ngut ki briew ha ryngkat ka jingpynjulor kaba shyrkhei.

“Kawei ka longïing baroh kawei ka la shah tep ha ka jingtwa khyndew, uwei u kpa bad u khun samla jong u ki la shah rong noh haka umsaw, bad lai pateng ki kynthei ki la shah pynduh jait noh da ka jingtwa khyndew. Ki para jong ngi kila don hapdeng ka jingsyier bad shah ktah kaba jur na kane ka jingshah pynjulor kiba la wan jia namar u ‘lapbah,” la ong u CM haba kdew halor kane ka jingjia shah pynjulor ba shyrkhei.

Kumta na ka liang u CM u la kyrpad ia ki paidbah ka Jylla ba kin wan shakhmat ban noh synniang lem sha ka Chief Minister’s Relief Fund, kata la ka long kaba rit ne kaba heh khnang ban lah ban pynkloi ia ki kam aijingiarap bad ban tei pat ia ki jingshah pynjulor ba shyrkhei jong ka imlang sahlang.

“Ka jingnoh synniang ka jong phi ka long kaba kongsan ban pynioh ia ki lad jingiarap bad tei pat ia ka imlang sahlang ka jong ngi. Ryngkat lang, ngin lah ban pynphai biang ia ka jingkyrmen bad ban ialeh pyrshah hapdeng jong kane ka jingeh,” bynrap u Conrad Sangma.

Ki jingbatai bniah halor ki rukom noh synniang: