Kyrpad u VC ka NEHU ia ka JAC ban ym pyniaid shakhmat ia ka jingiakhih khlem da bishar bniah ia ka nongrim jong ka jingdawa

Syllad | The Rising MeghalayaNovember 10, 2023

U Vice Chancellor North Eastern Hill University (NEHU) Prof PS Shukla haka sngi Thohdieng u la kyrpd ia ka Joint Action Committee (JAC) ba kan sangeh ban pyniaid shakhmat ia ka jingiakhih ba khlem buh por jong ki khlem da bishar bniah ia ka nongrim ka jingdawa ka jong ki khnang ba kan ym ktah ha kaba iadei bad ka jinglong jingman baroh hapoh kane ka skulbah.

U Prof Shukla u la ong ba kane ka dei ka por ba ban pynkhreh ia ki eksam jong ka bynta kaba nyngkong ha une u Nohprah u ban wan bad ki jingpynthut ha ka rukom jong ki jingiakhih khlem da bishar bniah ia ki jingshisha kin pynthut ia kine ki jingtreikam bad ia ka pule puthi hapoh ka university.

“Ka University ka kyrpad ia baroh ki kynhun ba kin wan sha ka miej jong ka jingiakren bad ban pynpaw ia ki mat kiba ki don ban pynpaw bad halor ki sienjam ba la shim da ka university ha ka jaka ban shim da ki lynti jong ka jingiakhih,” u la ong.

U la ong ba kane kan iarap ia ka university ba kan lah ban pyniaid beit ia ki jingtreikam bad ai ka jingshakri na ka bynta ka jingmyntoi jong ki samla pule hadien ka jingiapynbeit ha kaba iadei bad ki mat kiba iadei bad ka jingpyntreikam ia ka National Education Policy (NEP) 2020. Kano kano ka jingpynthut ha kaba kum kane ka por jong ka jingpynkhreh ia ki eksam kan pynthut ym tang ha kaba iadei bad ka jingpyndep ia ki syllabus hynrei ruh ia ka jinglah ban pyniaid beit ia ki eksamin ka ban ktah jur ia ki samla pule.

Hapoh ka lama jong ka JAC, ka NEHUTA, NEHUNSA bad ka NEHUSU ha ka sngi Palei ba la lah ka la shim ia ka rai ban nang pynjur ia ka jingiakhih da kaba khot pynlong ia ka jingiakhih kaba khlem buh por naduh ka 13 tarik mynta u bnai kum ka dak ban pynpaw pyrshah ia ka jingkuman u VC kja NEHU bad ia ka jingleh bym suitniew halor ki 9 tylli ki mat jingdawa ki jong ki.

Haba jubab halor ka jingdawa jong kine ki kynhun kiba pynlong ia ka jingiakhih, na ka liang u VC u la ong ba u la dep ban pynshai ia ka nongrim halor ka jingthung ia u Rohit Prasad ha ka jingialang bad ki lad pathai khubor ha ka taiew ba la dep.