Kyrshan ka AJYWO iaka jingdawa maramot iaka surokbah NH 6

Syllad | The Rising MeghalayaSeptember 14, 2023

Ka All Jaiñtia Youth Welfare Organisation – East Jaiñtia Zone (AJYWO-EJZ) kala ai ka jingkyrshan ba pura ia ka Synjuk Waheh Shnong (SWS), East Jaiñtia Hills District, Khasi Students’ Union– Narpuh Circle halor ka jingai por ba khatduh (Deadline) ia ki bor sorkar ban maramot noh ia u National Highway 6 (NH 6).

“Ka jingsniew sha ba palat pud jong ka surok NH-6, kaba dei u thied snam jong ka jylla Meghalaya bad ruh jong kiwei pat ki Jylla ha ka thaiñ Shatei Lam-mihngi jong ka Ri India,  ha baroh shilynter, kata, naduh Soomer, West Jaintia Hills haduh Malidor, East Jaintia Hills, ka long kaba i sangot shisha, kaba la buh ha ka kordit bah ia ki paidbah nongleit nongwan ym tang ia kiba napoh ka jylla hynrei na kiwei kiwei ki jylla ka ri India”, ong u Ma Heatermoon Ryngkhlem, president ka AJYWO-EJZ.

U Ma Ryngkhlem ula ong, “Ka jingsniew jong kane ka surok ym tang ba ka buh jingeh ia ki nongleit nongwan, hynrei ka buh ruh ha ka jingma kaba khraw ia ki kali bad ki mynsiem briew ba kordor kiba dei iaid lynti lyngba kane ka surok. Kane ka jingleh kuman jong ka sorkar halor ka jingsniew jong kane ka surok, kala pynbitar shikatdei eh ia ki paidbah”.

“Ia mynta, kane ka surok, ym i kop shuh kum u National Highway namar dang lah u surok pohshnong (internal roads) bun bun shah. Ka jingbym maramot pynbha ka sorkar ia kane ka surok la iohi kumba ki trai kali ki khlem siew khajna surok,” ong u nongialam ka AJYWO

Kumta na ka bynta ka bha ka miat bad ka suk ka saiñ jong u paidbah ba leit ba wan lyngba kane ka surok, ka AJYWO – East Jaiñtia Zone, ka kren shai ba ka ai ka jingkyrshan kaba pura ia ka SWS, EJHD, KSU halor ka jingai por ba khatduh (Deadline) jong ki ia ki bor ba dei peit ia une u surok ban maramot noh kloi kloi ia kane ka surok.