Kyrshan ka EJHTO&TA ia ka jingai por ban maramot ia ka surok NH-6

Syllad | The Rising MeghalayaSeptember 14, 2023

Ka East Jaintia Hills Truck Owner & Transporter Association (EJHTO&TA) ka ai ka jingkyrshan kaba pura ia ka Synjuk Waheh Shnong East Jaintia Hills District bad iaka Khasi Students’ Union-Narpuh Circle halor ka jingaipor (Deadline) jong ki ia ka sorkar ba kan maramot noh mardor ia ka surok National Highway-6, kaba la jot rathai.

Ha u kyrwoh lyngba u president u Ma Kyrshan Dkhar ka EJHTO&TA kala pynpaw ka jingsngewkhia kaba jur namar ka jingsniew palat pud jong kane ka surok, kata ym tang ba ka la ktah ia ki paidbah nongleit nongwan, hynrei ka la buh ruh ka jingma kaba khraw ia ki kali bad khamtam eh ia ki mynsiem briew kiba hap ban iaid lyngba kane ka surok.

Kumba ka long mynta u la ong ba baroh ki paidbah ki la pynpaw ia ka jingbitar halor kane ka jinglong jingman jong kane ka surok NH-6. Kumta na ka bynta ka bha ka miat jong u paidbah ka EJHTO&TA ka dawa jur na ki bor ba dei peit ba kin phah maramot noh mardor.