Kyrshan ka Elaka Narpuh iaka Star Cement ban pynheh par mawshun bad pynmih dewbilat 2.99 million ton haka shi snem

Syllad | The Rising MeghalayaJanuary 30, 2022

Ki artylli ki public hearing ne ki jingpynsngew paidbah ba la khot pynlong da ka Meghalaya State Pollution Control Board (MPSCB) kawei naka bynta ban pynheh ïaka par tih mawshun jong ka karkhana Star Cement Ltd haka jaka kaba heh 70 Hectare bad haka juh ka por ban pynheh iaka jaka pynmih clinker ne dew sain dewbilat bad ka jingpynmih bording kala long kaba iaid beit iaid ryntih kaba long ha phyllaw jong ka iing dorbar ka shnong Lumshnong haka sngi Saitjain.

Ka Star Cement ka don jingthmu ban pynbun shuh shuh iaka jingpynmih mawshun jong ka naka 9 Lak ton haka shisnem sha ka 25 lak ton haka shi snem. Katba kawei pat ka jingpynsngew paidbah kalong ha kaba iadei bad ka jingshna iaka Line II kaba iadei bad ka jingpynmih dewbilat, Clinker bad ka bording.

Kane ka Line II kaba katkum ba long mynta ka jingpynmih ia u Clinker kalong 3.3 MTPA, Cement 2.0 MTPA bad Waste Heat Recovery Boilers (WHRB) ne bording 15.5 MW.

Ka thong jong ka karkhana ban pynheh iaka Line II ban pynbun iaka jingpynmih mar kaba 4.09 MTPA u Clinker, 2.99 MTPA ka dewbilat bad 20.17 MW da ka buit teknoloji Waste Heat Recovery Power Plant.

Ha kane ka public hearing ka MSPCB la iadonlang u Deputy Commissioner ka East Jaintia u Abilash Baranwal, IAS, u ADC ka East Jaintia u Bah SS Syiemlieh nalor kiwei kiwei.

Baroh ki nongkren kynthup naduh kiba pyrshah bad nongkyrshan ki don 86 ngut bad ki shithi ba phah da ki riew shimet bad kynhun sengbhalang ki don 70 tylli.

Ka Elaka Narpuh baroh kawei kala ai ka jingkyrshan ia kane ka jingthmu jong ka kharkhana ban pynheh iaka par mawshun kumjuh ka shnong Lumshnong baroh kawei.

U Monlang Ladong Waheh Shnong Lumshnong haka jingkren ula ïathuh ba haki Lai tylli ki snem kata naduh u 2019 haduh mynta ka Dorbar shnong lyngba ka jingai jingmut jong ki nongshong shnong ka la lah ban pynkohnguh ïaka Star Cement katkum ka jing ïakut ban pynioh iaki kam pynroi hapoh shnong.

Kiba pyrshah ïaka jingtih mawshun kynthup ka shnong Umlong kumjuh ki kynhun sengbhalang ba kynthup ka KSU Narpuh Circle, ka JSU Umlong Unit bad kiwei kiwei, kila pynpaw ba ka jingdon ki karkhana ha katei ka thaiñ ka buh ha ka jingma kaba khraw ïaka ri bad ka jaitbynriew ba shi troh kumta ka sorkar, ki bor shnong, kim dei shuh ban pyrkhat tang ïaka pisa lane ka jingmyntoi kaba mynta, hynrei ki ladei ban pyrkhat ruh iaka sawdong sawkun ka mariang bad ka pateng ban wan.

Ia kane ka public hearing la pynlong hapdeng ka jingpahara kaba jur jong ki pulit.