Kyrshan ka FKJGP iaka shnong Thangskai ba ieng pyrshah iaki ñiut plastic ka karkhana dewbilat

Syllad | The Rising MeghalayaMarch 30, 2022

Ka FKJGP East Jaintia Hills District kala ai ka jingkyrshan kaba pura iaka Dorbar Shnong Thangskai halor ka jingieng pyrshah jong ka ïaka jingwanrah ñiut plastic ka karkhana dewbilat ka Dalmia Cement na shabar ka jylla.

U DH Sumer general secretary FKJGP Khliehriat, ula ong ba ka FKJGP ka sngewkhia halor kane ka jingwanrah ñiut kane ka karkhana dewbilat na shabar bad ka rukom lumthup ïaki ñiut plastic kat shaba lap ba shem ha katei karkhana ka buh ka jingma kaba khraw iaka mariang bad ka koit ka khiah u briew.

“Ka jinglehbymsuidniew ka Dalmia Cement Ltd  iaka dorbar shnong Thangskai wat hadien ba kila pyrshah iaka jingwan rah ñiut ka pynpaw shai ba kane ka karkhana kam burom ia kino kino ki jingpynbeit ka shnong, kumta ka FKJGP ka don ryngkat bad ka bor shnong bad lada donkam ban mih paidbah ruh kan mih ban ai ka jingkyrshan iaka shnong Thangskai,” la ong u Sumer.

Pule shuh | Na Guwahati Mizoram Agartala wanpoi ki ñiut ha Dalmia Cement phah khang ka dorbar shnong Thangskai

Ki nongialam ka shnong ka Thangskai ki dei ruh ki nongialam ka FKJGP kiba kynthup ia Alprins Dkhar uba dei ruh u Adviser bad u Welking Swer, Vice President bad lada jia ka ei kaei kaba sniew ne ka jingjia ba sngewsih ia ki bad ia ki nongialam ka Shnong hi baroh ka wei, ka bor pyniaid ka Dalmia Cement Ltd bad ka ophis u Deputy Commissioner East Jaintia Hills District Khliehriat kin shim ia ka jingkitkhlieh.

Ka FKJGP ka pynrem ruh iaka ophis u Deputy Commissioner, East Jaintia Hills District Khliehriat kaba la sngap man man iaka jingdawa jong ka Dorbar Shnong Thangskai ban tuklar ia kane ka jingwan rah ñiut ka karkhana dewbilat na shabar ka Jylla.

Pule shuh | Bret ñiut ka Jowai Municipal Board ha wahduid, theh umpjah iaka kam iada Myntdu: SSWA