Kyrshan ka JSU iaka jingiakhih ki nongtrei EMRI 108

Syllad | The Rising MeghalayaJuly 21, 2019

SHILLONG: Ka Jaintia Students’ Union (JSU) ka ai ka jingkyrshan kaba pura ia ki jingdawa jong ki nongtrei jong ka EMRI- Ka Meghalaya EMRI Workers Union (MEWU) ha khmat ka sorkar ban pynkiew iaka tulop bad ban thung nongtrei bad kiwei kiwei ki mat jingdawa.

Ki nongialam bad dkhot ka JSU hapoh ka jingialam u Presidentu Lawyerson War bad ryngkat u President ka Shillong Circle u Treiborlang R Suchen bad kiwei pat ki para dkhot kila leit kynduh kyrpang ia ki nongtrei ka EMRI ha J.N.Stadium, Polo Ground Shillong kiba la iakhih khlem buh por. Kine ki nongialam ka JSU kila pynpaw ka jingsngewkhia ia ka jingshem jingeh bad ka jingshah lehbein jong ki nongtrei jong ka EMRI 108 ha ki nongpyniaid ka GVK EMRI bad ka seng JSU ka ai jingkyrshan ia ka seng Meghalaya EMRI Workers Union (MEWU) kiba dawa ia ka hok jong ki na ka sorkar jylla.

U President Lawyerson War u lah ong ba ka seng ka dap da ka jingsngewsnguh ia ki nongtrei jong ka EMRI 108 namar ka jingshakri hok ka jong ki ia ki nongshong shnong ka Jaintia Hills bad kiwei kiwei ki district khamtam sha ki jaka nongkyndong kiba jngai na ki PHC bad CHC bad u la ong ruh ka sorkar ka la dei ban shah shkor ia ka jingeh jong ki nongtrei ka EMRI namar kidei kiwei kiba ai jingshakri ia u paidbah ba pang ba shitom bad ka dei ban pynurlong ia ka jingdawa jong ki nongtrei ka EMRI khamtam ha kaba iadei ban pynbiang ia ka tulop ka jong ki bad kiwei kiwei ki bor ki kor sumar hapoh ki kali ambulance.

U President ka JSU Shillong Circle Treiborlang R Suchen u la ong ba lada ka sorkar ka leh bymsuidniew ia ka jingdawa jong ka Meghalaya EMRI Workers Union (MEWU) ka mut ka ñiew bein ia ka hok jong u paidbah. U Treiborlang u la ong kumban shu pynkynmaw ka GVK EMRI la kumno kumno ka la jan dap shiphew snem ha ka jingai jingshakri ia ki nongpang ha jylla Meghalaya bad kat kum ka record ka EMRI kala ai jingshakri sha u paidbah haduh Shi lak San phew hajar tam ki nongpang ha baroh ki distrik jong ka jylla Meghalaya bad ki nongtrei ki lah pyllait im kumba Khat hynniew hajar tam ki nongpang bad kumba Khat san hajar ngut ki case ha kaban pynkha khun hapoh ka jingsumar jong ki nongtrei jong EMRI 108 ha lynti ban leit buh sha ki jaka ai jingsumar ne ki hospital.U Treiborlang Suchen u la kyntu ia u myntri ka tnat ka koit ka khiah ba pynioh iaka jingdawa jong ki nongtrei EMRI bad ban peit iaka jingeh jong kine ki nongtrei namar bun na kine kidei ki trai ri trai muluk. Ka JSU ka dawa ba u myntri ka koit ka khiah U Bah AL Hek un shimkhia mar mar ban pynbeit noh kloi ia kane ka jingeh khnang ba u paidbah ba pang ba shitom un nym shah ktah.

U President ka JSU Shillong circle u la kyntu lem iaki nongshong shnong jong ka jylla Meghlaya khamtam ia kito ki ba lah ioh jingsumar bad jingshakri na ka EMRI ba kidei ban pynsngew lem ka sur ban ai jingkyrshan lem ia kine ki nongtrei EMRI kiba dang don hapdeng ka jingiakhih khnang ka jingdawa jong ka synjuk Meghlaya EMRI Worker Union kan long kaba jop.