Kyrshan ka JSU & RBSU iaka jingdawa pyndam iaka kot Sociology

Syllad | The Rising MeghalayaMarch 16, 2020

Ka Jaintia Students Union lyngba u Education Secretary u Request Pakma uba long ruh u General Secretary ka JSU Shillong Circle ha ryngkat u President ka Ri Bhoi Students’ Union (RBSU) u Everjoy Nongpluh ki ai ka jingkyrshan iaka KSU & FKJGP ban dawa pynduh pyndam shi syndon iaka kot pule jong ka Sociology Class-XII jong ka Indian School Certificate hapoh ka Jylla Meghalaya ba la thoh da uwei u nongthoh kot u Manjir Gosh ba la pynmih da ka Kalyani Company namar ka jingpynsngewthuh bad ialam bakla iaki khynnah pule jong kane ka Jylla kiba hap hapoh ka jingkhmih jong ka ISC.

Kine ki ar seng ki la pynpaw ba kin nym pdiang da leilei ia kum kine ki kot pule kiba thmu ban ialam bad pynsngewthuh bakla iaki khynnah pule.

Kum kine ki jingthoh ba pynmih ha katei ka kot pule ka long ruh kum ka jingkheiñ dewthala bad ka jingbym burom iaka jaitbynriew jong ngi hi baroh kawei namar ka la ktah mationg ruh iaka jingsngew jong kiba bun balang.

U nongthoh ula shuh thoh ha la ka jingsngewthuh khlem da tih bniah lane pynshisha ha shwa ban pynmih ia katei ka kot pule kaba lehse kan ktah pat khamtam eh iaki khynnah pule ha ki jingnang jingtip ka jong ki.

Kumta ki ar seng ki kyntu ruh ki skul kiba don hapoh ka Jylla ba kim dei ban shu pdiang kulmar iaki kot pule khlem da pule bad peit bniah bha ha shuwa ban buh ha ka Syllabus jong ki khynnah pule.