Kyrshan ka KSU ïaka jingdawa pynshai paidbah ka MECF ïaka soskular ka MePDCL bad ka FEDCO

Syllad | The Rising MeghalayaApril 16, 2019

SHILLONG: Ka KSU South West Khasi Hills District ka ai ka jingkyrshan ïaka jingdawa jong ka Mawkyrwat Electricity Consumers Forum (MECF) ba ka MePDCL ka dei ban pynshai paidbah ïaka jingiasoi soskular ne Memorandum of Understanding jong ka bad ka company Feedback Energy Distribution Company Limited (FEDCO), kaba na Orissa  hashuwa ban aiti ia ka jingpyniaid ïaka kam sam bording ha katei ka District.

U Michael Dingan,  Assistant General Secretary KSU ula ong ba ka KSU South West Khasi Hills District kala wan ïakynduh ïa u Chief Engineer (Commercial) jong ka MePDCL ha Lumjingshai,  Shillong haka 28 tarik u bnai Lber ban pan jingshai halor ka jingthmu aiti ïaki ar tylli ki Sub -Division ha Mawkyrwat bad Mawsynram  sha ki company.

Kawei pat ka mat ka dei halor ka jingthung kam thungjam, kaba ka KSU kala dawa na Chief Engineer ban pynthikna ba ki company kim dei ban thung kam da ki briew kiba nabar ne wanrah briew na bar khnang ba ki samla ki bym pat ïoh kam ha kane thain ki lah ban ïohkam.

U Michael Dingan ula ong ba watla ka seng kala buh jingdawa hakhmat u CE ka MePDCL, hynrei ka pynrem jur namar ba ka MePDCL ka ïaid lait ïaki nongialam shnong bad ki sah haka umdum halor ka jingthmu aiti iaka kam pyniaid bording haka FEDCO.

Ka KSU ruh kala kyrshan ïaka  jingdawa ka MECF ka tnad pynmih bording ka dei ban pynshai paidbah shuwa haki shnong bapher bapher kum ha Mawkyrwat, Ranikor bad Mawsynram khnang ba ki paidbah bad ki nongialam shnong kin sngewthuh shai ïaka jingtreikam ka company. Ka KSU ka kyrshan ruh ka ban jur ïa u paidbah ba kim pat dei ban siew bai bording, katba ka MePDCL kam pynshai ïaka soskular bad ka company FEDCO.