Kyrshan ka KSU iaka jingiakhih ka ECC Sutnga ban khang ia baroh ki Coke Factory

Syllad | The Rising MeghalayaAugust 5, 2021

Ka KSU Jalaphet Unit, Elaka Sutnga kala ai ka jingkyrshan ba pura ia ka Environmental Coordination Committee (ECC) Elaka Sutnga halor ka jingdawa ban khang khyrdep iaki Coke Factory ne ki karkhana saiñ rnga dewiong beain kiba la ieng rasong kum ki tit.

Ka KSU kala ong baroh kine ki karkhana la shna ha ki jaka sah briew bad kala ktah bha iaka koit ka khiah ki briew namar ba kine ki karkhana kila leh bymsuidniew ban thang dusmon ia u dewiong bad pynmih dusmon iaka tdem ne ka lyer bih kaba la ktah ia baroh ki nongshong shnong bad ka sawdong sawkun ka mariang.

Ka jingshna ia kine ki karkhana Coke Factory ruh ka la long shaba palat ha kaba tang ha kawei ka shnong la pynieng haduh 5-6 tylli bad ka jingktah iaka koit ka khiah bad ka haw kalong kaba jur bha

Ka KSU ka ai jingiaroh ruh ia u MLA ka Sutnga Saipung Constistuency Shitlang Pale uba la kloi ban iadonlang bad kyrshan ia kane ka jingdawa ka ECC Elaka Sutnga da kaba u la ia leit synranlang ia ki paidbah ka Elaka Sutnga ban leit tur sha ka Office u DC East Jaintia Hills ban dawa weng noh ia kine ki factory beain mardor.

Ka KSU kala pynpaw iaka jingsngewlyngngoh iaka jingioh lad kitei ki Coke Factory ban mih kum ki tit.

“Ka Assembly Committee on Environment kala wan jurip ia kine ki Coke Factory beain baroh, hynrei haduh mynta kam pat don kino kino ki dak ki shin ban pynshitom ia kine ki karkhana,” la ong Emmon Chyrmang president KSU Jalaphet bad kyntu iaka sorkar ban shimkhia halor kane ka bynta ban khang shisyndon ia kine ki karkhana beaiñ.