Kyrshan ka KSU iaka jingiakhih ka JHTOA dawa ban tuklar mardor ka sorkar halor ka bai kit bai bah thymmai

Syllad | The Rising MeghalayaDecember 16, 2021

Ka Khasi Students’ Union (KSU) Jaintia Hills District Unit ka ai ka jingkyrshan kaba pura halor ka jingiakhih jong ka Jaintia Hills Truck Owners’ Association (JHTOA) pyrshah iaki karkhana dewbilat ha rilum Jaintia halor ka jingbym pyntreikam iaka bai kit bai bah cement bad clinker thymmai kaba la pynbna aka sorkar  naduh mynshem snem.

Ka KSU Jaintia Hills District Unit hapoh ka jingialam u Ohibait Dkhar President, Kwilness Suchiang President KSU Narpuh Circle bad kiwei kiwei ki nongialam  kila ia kynduh iaki nongialamka JHTOA ba kynthup ia Nidamon Chullet president JHTOA ban iakren halor ka jingshah leh khliehshrieh ki trai trok wat hadien ka jingiakren kaba bunsien hadpeng ka sorkar bad ka synjuk ki karkhana dewbilat halor ka bai kit bai bah thymmai kaba duna 2 tyngka na ka jingpynbna ka sorkar, kata 7 tyngka na ka 9 tyngka haka 1 KM shi metric ton.

Ka KSU kala pynrem jur ia ki karkhana pynmih dewbilat kiba la iuhroit iaka hok ki trai shnong haka jaka ban ai kam kala khniot pynban kaba la wanrah iaka jinduhnong kaba khraw ia ki nongbuh trok bad wanrah ruh iaka jingsngewiapher hadien ba kine ki karkhana kila thied iaki trok, katba ki nongniah paid ki dei ki trai shnong kaba na ka jingiakhih ka JHTOA kine ki nongniah trok ki karkhana dewbilat tang ka bam ruh kim ioh bad shah sa ka nong.

Ka KSU kala dawa na ka sorkar ba ka dei ban bthah ia kine ki karkhana dewbilat ba ki dei ban pynurlong mardor iaki mat jingadwa jong ka JHTOA lym kumta kan hap ban shim da ka lynti kiba tyngeh ban pynpei shkor ia ki karkhana bad lada jia ei ei ka jingjia kaba sngewsih ka sorkar jylla bad kine ki company kin hap ban shim ia ka jingbah khlieh, ong u Nangaibormi Sutnga Publicity Secretary KSU JHDU