Kyrshan ka SWSRJ iaka jingiakhih dawa maramot surokbah NH-6 ka JAC

Syllad | The Rising MeghalayaJune 18, 2024

Ka Synjuk Waheh Shnong Ri Jaintia ha u kyrwoh ba ka phah kala ai jingkyrshan kaba pura iaka jingiakhih paidbah ban dawa maramot iaka surok bah NH-6 da ka Joint Action Committee jong ka Dong Namchiang kaba hap hapoh ka Elaka Narpuh, East Jaintia Hills District.

Ka kyrwoh lyngba u General Secretary Bah Kampher Pohlong ula ong ba ka Synjuk ka pynpaw ka jingsngewkhia iaka jingeh ba ki paidbah ka thaiñ ki iakynduh na ka por sha ka por ha kaba iadei bad ka surok bah NH-6.

Ula ong ba na ka liang ka Synjuk Waheh shnong Ri Jaintia ka pynrem jur iaka jingleh bymsuidniew jong ka sorkar ban pynbha pynmiat ia kane ka surokbah wat hadien bunsien ka jingdawa ne ujor jong ka JAC ban maramot ne pynbha iaka.

Ka surobah NH-6 kadei u budlum haka khaii pateng jong ka thain shatei lammihngi bad ka ktah ruh iaka leit ka wan ki paidbah jong ka thain bad kaba lah ban ktah iaka im ka iap khamtam haka pang ka shitom, la ong u Bah Pohlong.

Kumta da kawei ka sur bad da kawei ka jingmut ka Synjuk ka ai ka jingkyrshan kaba pura iaka jingiakhih khot pakhang iaka surok bah NH6.

Na kaliang ka FKJGP, East Jaintia Hills ruh kala ai jingkyrshan halor ka ka jingiakhih ka JAC Dong Namchiang ban dawa na ka sorkar ban maramot iaka surok.