Kyrshan ka VPP iaka rai iakhih paidbah halor ka jingsniew ka surok NH-6 ha East Jaintia Hills

Syllad | The Rising MeghalayaJune 17, 2024

Ka Voice of the People Party (VPP) Narpuh Circle ka lah rai ban ai jingkyrshan pura iaka JAC jong ka Dong Namchiang halor ka rai iakhih ban dawa maramot iaka surok bah National Highway 6.

Ka VPP Narpuh Circle ka pynpaw iaka jingsngewkhia kaba jur halor ka jingsniew palat pud ka surok NH-6 khamtam ha thaiñ Narpuh ha kaba ka jingiaid lynti ka long kaba jynjar iaki nongshong shnong bad ia kiwei ruh kiba iaid lynti na kane ka surok kiba dei na kiwei pat ki jylla. 

Kumta halor kane ka jingeh naka liang ka VPP Narpuh Circle ka lah iakynduh ruh bad u MP ba thymmai Dr Ricky AJ Syngkon bad ka lah pan jingiarap ruh na ki nongialam ka party ban iarap kren lem sha ka sorkar jylla na bynta kane ka jingeh jong ki paidbah namar ba ka MLA ka thain ka Kong Santa Mary Shylla kam pat lah ban pyndep iaki jingkular ki jong ka ha kaba iadei bad kane ka surok, ong u kyrwoh ka VPP.

Maramot iaka surok bah NH-6 ne mad iaka jingiakhih; ong ka ka JAC ki 11 shnong iaka sorkar

Ka VPP Narpuh Circle kan ai ka jingkyrshan ba pura iaka JAC ha kino kino ki jingiakhih ba shakhmat halor une u surok. Bad ka party ka khot ka wer ruh ia baroh ki nongkyrshan ban ai ka jingiasnoh kti lang ryngkat bad ka JAC khnang ba ka dong ka thaiñ kan ioh noh ia u surok uba bha.