Kyrshan ki nonghikai bad nongtrei ia ka Prof Sungoh kum ka Acting Vice Chancellor ka NEHU

Syllad | The Rising MeghalayaApril 11, 2025

Ka seng jong ki nonghikai bad ki nongtrei ka NEHU ka North-Eastern Hill University Teachers’ Association (NEHUTA) bad ka Non-Teaching Staff Association (NEHUNSA) ha ka 11 tarik Iaiong ki la ai ka jingkyrshan kaba pura ia ka Prof. Sherwin M Sungoh hadien ba ka la shimti kum ka Vice Chancellor In-charge jong ka Skulbah NEHU.

Ha kajuh ka por kine ki Association ki la pdiang sngewbha ruh halor ka rai ka jong ka ban hiar shuki noh kum ka Pro Vice Chancellor jong ka Shillong Campus.

Ha ka jingialang ka NEHUTA bad NEHUNSA kaba la long ha ka janmiet sngi Thohdieng kine ki artylli ki seng ki la bishar bniah ruh ia ka jinglong jingman hapoh kane ka skulbah.

U President ka NEHUTA u Prof. Lakhon Kma u la pynthikna ba kine ki seng ki ieng skhem ban aijingkyrshan ba pura ia ka Prof Sungoh hadien ba ka la shim ia ka jingkitkhlieh ban pyniaid ia ki kam ki jam kum ka Acting VC kaba long ruh katkum ka jingbthah da ka Ministry of Education.

U pyntip ruh ba ka Prof Sungoh kum ka Acting VC ka la ioh ia ka bor kaba pura kum u Vice Chancellor ban pyniaid ia ki kam ki jam jong ka skulbah, ban pyniaid ia ki jingialang jong ka Executive Council, Academic Council bad Finance Committee bad ruh ban thungkam shipor bad ban thung Pro Vice Chancellor, hynrei kam lah satia ban pynkylla thymmai ia ki kyndon ka University Act, Statutes, Regulation lane ki Ordinance.

Ka Prof Sungoh ka la don sha Tura na ka bynta ka kam haka sngi Thohdieng bad kam shym la don satia hapoh Campus. Ia ka shithi iehnoh kam jong ka kum ka Pro VC jong ka Shillong Campus la phah ha ka 9 tarik Iaiong, kata tang 20 sngi hadien ba ka la shimti ia kane ka kam.

Mynta ka la shimti kum ka Acting VC halor ka nongrim kum ka Professor kaba la rangbah tam kaba long ruh katkum ka Statute 2(A)(5)(i) jong ka Skulbah.

Ha ka shithi sha u Under Secretary ka Ministry of Education, ka Prof Sungoh ka la thoh : “Ngan treikam kum ka Vice Chancellor in-charge ha ryngkat ka bor ban pyniaid ia ki kam ki jam bad halor ki kam pisa tyngka ka ban long mardor” kala thoh.