Kyrshan u Bah Pala ia ka jingdawa tohkit halor ka jingpyndonkam ka NPP da ka pisa beain na u dewiong, drok

Syllad | The Rising MeghalayaSeptember 21, 2024

U nongialam ka Seng Congress u Bah Vincent H Pala ha ka 20 tarik Nailur u la ai ka jingkyrshan kaba pura ia ka jingdawa ba dang shen jong u nongialam ka Liang Pyrshah u Dr Mukul Sangma na ka bynta ban thung ia ka kynhun tohkit halor ka jingkynnoh pyndonkam bakla jong ka party synshar National People’s Party (NPP) da ka pisa beain na u dewiong bad drok.

Haba kren sha ki lad pathai khubor, u Bah Pala u la ong, “Nga ai ka jingkyrshan kaba pura ia ka jingdawa u Dr Mukul na ka bynta ban pynlong ia ka jingtohkit kaba bniah. Kane ka jingtohkit ka dei ban long na ka bynta kine ki 10 tylli ki snem kiba la dep.”

Une u MP barim ka Shillong u la kynnoh ruh da kaba ong, “Shah ngan ithuh ha phi ba ka kam shalan dewiong beain ka la sdang naduh kine ki shiphew snem ba la dep, bad u drok ruh lah palat 10 snem.”

“Kum ka nuksa mynta lada phi kit syiar na Guwahati sha Shillong, phin hap ban siew T.20,000 lane 30,000 shi pickup. Kine ki la mih ruh ha ki rynsan social media bad ki lad pathai khubor. Ka jingkit dewiong na Jaintia Hills sha Guwahati phin hap ban siew haduh T.96,000.”

“Lada ngi kit mawshun na Jaintia Hills sha Guwahati, phin hap ban siew T.20,000, kine ki la paw ha ki khubor. Lada phi kit shyiap ne kino kino ki mar phin hap ban siew bai rung. Kumta kine baroh ki la sdang naduh kine ki 10 snem kiba la dep,” bynrap u Pala.

Lah ban kdew ba u Dr Mukul uba dei ruh u Myntri Rangbah barim u la byrthen ban thoh sha u Myntri Rangbahduh ka ri na ka bynta ban thung da ka jingtohkit bad ruh ban shimkhia ia ka jingkynnoh jong u Bah Pala pyrshah ia ka NPP halor ka jingpyndonkam da ka pisa beain na ki kam shalan dewiong beain, u drok bad na ki kam kontrak khnang ban thied ia ki MLA na kiwei pat ki seng sain pyrthei.