Kyrshan u Bah Sanbor ban pyniakhun ia ka Dr Fenela na ka BJP ha kane ka ilekshon MP na Shillong

Syllad | The Rising MeghalayaFebruary 27, 2024

U MLA ka South Shillong u Sanbor Shullai haka 27 tarik Rymphang, u la phah da ka jingthoh sha u president ka BJP ka jylla u Rikman G Momin da kaba kyntu ban ai tiket ia ka Dr Fenela Lyngdoh Nonglait kum ka kyrtong jong ka party ha kane ka MP Lok Sabha napoh Shillong seat.

U Bah Shullai ha ryngkat katto katne ki nongialam ka party ki la kyrpad ruh ia u para dkhot u Bah AL Hek uba dei u dkhot ka kynhun Myntri bad u MLA ka Pynthorumkhrah ba un ai ka jingkyrshan ban pynieng ia ka Fenela, kata da kaba kyntu ruh ia u president barim ka party u Bah Ernest Mawrie ba un weng noh ia ka jingthmu ia aireng bad ban iatreilang ryngkat bad ki.

Haba kren sha ki lad pathai khubor hadien ka jingialang bad u president ka party, u Bah Shullai u la ong, “Nga la wan ha ryngkat ki nongkitkam ka South Shillong mandal ban ai ia ka shithi sha u president ka party ban pynpaw ia ka jingshim rai ka jong ngi ban aijingkyrshan ia ka Dr Fenela kum ka kyrtong jong ka party. Ngi kyrpad ruh ia ka party ba kan jied bad pynskhem ia ka kum ka kyrtong ka party na ka bynta ka Shillong parliamentary seat.”

“Ka Dr Fenela ka dei ka briew kaba la nang la stad bad kaba la pawkhmat bha bad kumta kan long ka kabu kaba khraw bha na ka bynta ka party.” U Bah Sanbor u pyntip ruh ba ki la phah ruh ia ka jingthoh sha u national vice president uba khmih ia ka Meghalaya u Dr Chuba Ao kumjuh sha u national general secretary uba khmih ia ka thain NE u Rituraj Sinha na ka bynta ban pdiang ia kane ka jingtyrwa.

U Bah Sanbor u la ong ruh ba un leit ban iakynduh markhmat ia u Bah Hek ban iakren sani bha halor kane ka phang bad khnang ba kim ki MLA ka party kin lah ban iakren bad ki nongialam ba halor jong ka party na ka bynta ban jied ia ka Dr Fenela kum ka kyrtong jong ka party ha kane ka MP ilekshon ka ban wan.

“Nga la iakren ruh ia u Bah Ernest Mawrie bad kyrpad ia u lada u lah ban weng noh ia ka jingthmu ia aireng khnang ba ngin ioh iatreilang,” ong u Bah Shullai da kaba pynpaw ruh ba u Bah Mawrie u la ong ba un hap ban ap ia ka rai jong ki nongialam ka party napoh central.

Nalor kata u Bah Shullai u la ong ba ki paidbah Khasi Jaintia ki la babe jur halor ka jingjied ia une u MP ka Congress ba mynta u Bah Vincent Pala namar ha kine ki san snem hapoh parliament u la shu pynlut por tang ha kaba bam soh ot.