Kyrsiew ka KYKWM iaka Jowai ban iada bad pynkhie im iaka Wah Myntdu

Syllad | The Rising MeghalayaJanuary 12, 2022

Ka Ka Khooid Ya ka Wah Myntdu (KYKWM) kala pynlong da ka Peaceful March bad Awareness Rally ban kyrsiew bad wer ia u paid nongshong shnong ban iada bad pynbha biang iaka wah Myntdu, kaba bsa um bam um dih bad basa um iaki pynthor ki hali jong ki shnong kiba tuid kane ka wah bad pynim jakpoh ia kiba bun na ki dohum dohpnat haka sngi ba Ar.

Ha kane ka Peaceful March  KYKWM kala iaid paidbah na Mihmyntdu, Ladthadlaboh, Moosalyngkat, Ïawmusiang, Tpep Pale, Dulong, Panaliar, Loomiongkjam, Iongpiah, Loomkyrwiang, Chiliang raij – Umchangiar, Khimusniang, Chutwakhu, Mynthong bad la pynkut ha madan Jrisalein, Chutwakhu, Jowai.

Shuwa ban iaid paidbah kala don ka jingialang ha madan Mihmyntdu.

U Phadar Hilarious Lamare uba khmih ïa ka Jowai Parish ula ong ba ka Wah Myntdu ka long ka jingai sngewbha na U Blei ïa ki nongshong shnong jong ka Ri Lum Jaintia hynrei mynta U Blei ruh U sngewsih ban ïohi ba ki khun bynriew kim suidñiew ïa ka jingai sngewbha jong U.

U Bah T W Blah uba long u nonghikai skul bala shongthait ula ïathuh ba ha ki por jinglong khynnah jong u ki juh leit bam doh sharud ka wah Myntdu bad ka wah ka dang long kaba khuid bad kaba sngur.

U President jong ka JSM Western Region u Ribok Biam ula pynpaw ïaka jingbynñiaw jong u halor ka jingkheiñ sting jong ki paidbah jong ka Ri Lum Jaintia ïaki kam kiba ktah ïaka ïap ka im jong ka jaidbynriew katba ki smat ban leit sha ki kam sngewbha ka pyrthei.

Kiwei de ki nongkren ha kane ka jingïalang ki long u phadri jong ka Church of North India u Ma C Dhar, u Secretary ka shnong Mihmyntdu u Ma Kmen Shylla nalor kiwei de.

Ki nongrwai kiba paw bha ha rilum Jaintia kiba kynthup ïaka samla Dawbhaki Pde, Marleki Lytan, Sevenkisius Lamare, ka Morialda Paswet, Kyns & Mates bad kiwei kiwei ki la ai ïa ki sur jingrwai kiba don jingmut bad pynkyndit thiah ïa ki paidbah ban ïeng ïada noh ïaka Wah Myntdu.

Ha ka jingialang ha madan Jrisalein, Chutwakhu, ka Divisional Forest Officer, Wildlife Division, ka Kong H Lato haba kren kala kyntu ïaki paidbah ban kiar noh na ka jingpyndonkam jong ki plastic haba thied jingthied bad dih um na ki plastic ki pynjaboh ïaki wah ki lum.

U Rev Dr. HH Mohrmen ula ong ba ki aiñ ki bun ban ïada ïaki lum ki wah hynrei kaba sngewsih ka long ba ka jingpyntreikam jong kitei ki aiñ pat ka long kaba duna bad kaba tlot.

U President ka Seinraij Jowai u Bah OR Challam ula ïathuh ba ka tnat Forest ha u snem 2019 ka la kular ban pynkhuid bad pynkhie biang ïaka wah Myntdu wah Lukha hynrei haduh mynta kane ka jingkular ka dang sahkut ha lyer.

Kiwei de ki nongkren ki long u Jurbha Phawa uwei na ki nongrep, ka Kong Linda Ryngkhlem, u Bah H.B.N.Nonglang, u Ma B. Shylla General Secretary, Synjuk Waheh Chnong Ri Jaiñtia, u Ma Alan Niangti President, Synjuk Waheh Chnong Jowai, u Ma E.M.H Passah bad u Khroo L Pariat President Khooid Ya Ka Wah Myntdu.

Kane ka jingïalang ka la shim ïaka rai ban dawa ïa ka sorkar kmie lyngba ka sorkar jylla ban ithuh noh ïa ka Wah Myntdu kum ka Wah jong ka Ri India ne National River bad ban pynbha bad pynkhie im biang ïaka.