Kyrsiew ka KYKWM iaki nongshong shnong ka Jowai ban iasnohkti lang haka jingpynneh iaka wah Myntdu

Syllad | The Rising MeghalayaNovember 2, 2024

Ka Sein Khooid Ya Ka Wah Myntdu (KYKWM) hadien ka jingiaid lynti ban dawa iaka hok ka Wah Myntdu bad ka jingshngaiñ ki dohum dohwah, ha kine ki sngi kila sdang ban iuhkjat ha man ki dong ki shnong jong ka Jowai ban pynlong iaki jingpynsngewthuh halor ka phang ‘Save River Myntdu’.

Ka jingthmu ba hakhmat ka long ban kyntu iaki paidbah nongshong shnong ban don iaka jingkitkhlieh halor ka jingshah ktah ka wah Myntdu ha kine ki sngi na kadaw ka jingshna iaka surok kaba iaid lyngba na Khliehtyrshi haduh Treiongriang.

Haka 1 tarik Naiwieng, ka Sein Khooid Ya Ka Wah Myntdu kala pynlong iaka Awareness Programme ha dong Loomkyrwiang bad ka jingkren pdiang na u General Secretary Ma Soolangki Laloo

U Khroo Lamsalanki Pariat, President KYKWM haba pyniaid iaka jingialang ula iathuh shaphang ka jingiaid lynti ka Sein Khooid Ya Ka Wah Myntdu.

Shuh shuh ula ong ka daw ka jingpynlong ka seng iaka jingiuhkjat ha man ki dong ki shnong ka Jowai ka long ban pan ka jingiatreilang jong ki paidbah kiba shong basah haki sawdong sawkun ka Myntdu namar tang ka bor barit jong ka seng, la sakhi ba wat hapdeng ka jingdon jong ki ain sorkar kiba teh ba khum hynrei ki bor sorkar kim shimkhia ban leh ia kaba donkam ne sngap iaka jingud jingnam jong ki dkhot ka seng.

U Ruhipaia Lamar, kum uwei na ki dkhot ka seng haka jingkren u pynkynmaw iaki kyntien jong u Myllung Soso Tham da kaba ong, haba phai ha kine ki sngi kiba mynta ka shnong Jowai kumjuh ka ri bad ka jaitbynriew ki don haka jingma kaba khraw, ka daw hi ka long ba ka pateng bad ka juk stad kaba mynta ka lyndet bad klet noh iaki jingstad bad jinghikai ki longshwa manshwa.

Nalorkata ula ong, ka juk mynta kiba bun ki pyrkhat tang ban dap ban biang shimet hynrei khlem pyrkhat lang iaka bha ka miat kaba long salonsar.

U Daioolang Pakma, symbud Waheh Chnong LDC, ula kum ki nongshong shnong ha kine ki sngi ka long shisha ka jingtynjuh iaki longiing ka shnong ka thaw namara ym lah pynthikna la ka umban umdih ka long kaba biang bad kaba khuid ba sam lyngba ka PHE. Ki longiing kiba dap ba biang ka ioh ka kot ki lah ban thied iaka umbam umdih katba ki longiing ba duna ka ioh ka kot ka long ka jingtim. Une u dei u dak jingkylli kum ki nongshong shnong kiba shaniah umbam umdih, um rep um riang na ka wah Myntdu.

Kumta ula khot wer iaki khun ka dorbar shnong ba ka por kamdei shuh ban shong klikti ne khnium hapoh iing, hynrei shim ka jingkitkhlieh ban mih shakhmat ban dawa iaka hok kum ki nongshong shnong kiba im haki sawdong sawkun ka wah Myntdu da kaba iatreilang bad ka Sein Khooid Ya Ka Wah Myntdu khnangm

Iaka jingialang la pynwai da ki kyntien ai khublei ba u Daohi Manner uwei na ki khun samla ka shnong Jowai uba don ka jingthmu ban pynmih iaka kot shaphang ka Wah Myntdu ka ban ioh ki khynnah ban pule haki skul.