La 11 ngut kiba la iap ha Mukroh na ka jingthombor ka Assam: Dorbar Shnong Mukroh

Syllad | The Rising MeghalayaNovember 27, 2022

Ka Dorbar Shnong Mukroh, West Jaintia Hills District ka la kyntait mardor ban pdiang ïaka song ïarap pisa ba la pynbna da u Myntri Rangbah jong ka Assam u Himanta Biswa Sarma naka bynta ki longïing jong ki san ngut kiba la duh ei ïa la ka jingim ha ki kuli jong ki pulit bad nongtrei tnad khlaw ka Assam ha ka 22 tarik mynta u bnai ha Lumpalang Mukroh.

Haba ïakren bad ki lad pathai khubor, ki nongïalam shnong kynthup naduh u Waheh Shnong ka Mukroh u Hamboide Sumer, u Secretary shnong u Hamarbathmu Muskut, u Chairman shnong u Deibormi Lamin, ki ïathuh ba ka jingkyntait ïa katei song jingïarap pisa na ka Sorkar Assam kadei kaba la mynjur lang da ki ba haiing hasem jong kitei ki san ngut ki briew.

Haba kylli hato ka juh don kano kano ka jingpyndik da ki nongtrei ka tnad forest jong Assam shwa kane ka jingjia, u Waheh Shnong u Hamboide Sumer ula ïathuh ba ka jingshah pyndik ki nongshong shnong ka long kaba man ka por haki pulit jong ka Assam naduh ba don ka tnad Forest jong ka Assam kaba la shna beaiñ ha Khlieh Sanaro, Mukroh.

Ula ïathuh shuh shuh ba ka jingshah pyndik ki nongshong shnong kynthup naduh ka ka jingthung synsar, ka jingpom dieng thang, ka jingkit phlang ïap ban shna ïing, nalorkata ki pyndik ruh ïaki khynnah sharai masi sharai muid, ïaki kynthei khynnah kiba leit tong dohthli dohtham sha lum sha wah bad haba ki ïakynduh ïaki haki lynti synkieng ki kem bad rah sha Jrikyndeng ban pynshitom bad daiñ kuna haka dor ba rem.

Ha kaba ïadei bad ka jingkam ba ka Shnong Mukroh ka hapoh ha Block-1, u Waheh shnong ula pynshai ba ka Mukroh kam hap satia ha Block-1 hynrei ka hap hapoh u pud u sam jong ka Jaintia Hills District bad ïaki kot ki sla kynthup naduh ki kot pata ki Landholding la ïoh beit naka JHADC.

Shuh shuh ha kaba ïadei bad ka jingpynmih khubor jong ka Assam ba ka Mukroh ka hap hapoh ka Jrikyndeng Police Station, u Waheh shnong ula pynshai ba ka Mukroh ka hap hapoh ka Nartiang Police Station, West Jaintia Hills District.

Ha kaba ïadei bad ka jingkynnoh jong ki pulit Assam ba ki paidbah nongshong shnong jong ka Mukroh ki la rah da ki tiar pynmynsaw bad pynïap ïa u Forest Gaurd jong ka Assam, ula pynshai ba ki paidbah nongshong shnong kim don satia kano kano ka tiar pynmynsaw bad ïa u Forest Guard jong ka Assam la siat ïap hi da ki briew jong ka Assam.

Ha kaba ïadei bad ka jingthmu jong ka Assam ban tei ïa u mot sah nam ïa u Forest Guard jong ka ha Lumpalang Mukroh, u la ong ba ka Dorbar Shnong kan pyrshah thlong mluh thlong sying ïa kane ka jingthmu jong ka sorkar Assam.

Hadien ka jingsaphriang khubor bad jingkam jong ka Sorkar Assam ba ka Shnong Mukroh ka hap hapoh ka jaka ïakajia bala tip kum ka Block-I, ka Dorbar Shnong Mukroh ka la sei madan shi syndon da ki kot ki sla bad ki map ba la ïoh na ka District Council Jowai, Autonomous District Jowai ne ka Jaintia Hills Autonomous District Council (JHADC) kaba mynta.

Ïa kane ka map la ïoh ha u snem 1968, kaba la pyni ba ka shnong Mukroh ka hap hapoh Jaintia Hills ym ha Block 1, la pynshai u Waheh Shnong ka Mukroh bad ula pynshai ruh ba ïaki khlaw shnong jong ka Mukroh la kam jubor mynta da ka Assam.

Ula ïathuh ba mynshwa u pud u sam jong ka shnong Mukroh udei naduh Mutha Siangkwai bad mynta la knieh noh da ka Assam bad la shong shnong da ki Karbi bad mynta la tip noh ïaka kum ka Umlawan kaba dang hap hapoh u pud u sam ka shnong Mukroh.

“Lada ka Sorkar Jylla kam buh ktem pulit mardor ha ka Shnong Mukroh, West Jaintia Hills District ki nongshong shnong jong ka Mukroh da leilei kin nym sngew shngaiñ bad kin ïai im haka jingsheptieng bad jingsngew syier ïaki pulit bad nongtrei forest jong ka Assam kiba la dkhat jubor ïaki san ngut ki para shnong jong ki”, la ong ki nongïalam shnong ka Mukroh.

Kumta ban shngaiñ ka pateng ban wan, kine ki nongïalam shnong ki la kyrpad ïaka sorkar Jylla ban shim khia bad ban buh ktem pulit haka shnong Mukroh bad dawa ruh ban pynkynriah mar dor ïaka Forest Beat House jong ka Assam kaba la buh beaiñ da ka Assam kaba don ha Khlieh Sanaro, Mukroh namar ka jingdon jong ka, la mih bun ki jingklumar ha katei ka thaiñ.

U Waheh Shnong ula pynkynmaw ruh ïa kajuh ka jingjia kaba la jia ha u snem 2003 kaba ki riew thrang snam jong ka Assam ki pynïap haduh 6 ngut ki khun jong ka shnong bad ha kane ka kynti ruh kum kane ka jingjia ka la wan jia biang hapoh ka shnong Mukroh da kaba duh haduh San ngut ki rangbah jong ka shnong.

Ula kynnoh ba kane ka jingjia ka wan jia biang dei na kadaw ka jingkheiñ sting jong ka sorkar ka Meghalaya naduh kaba mynshwa haduh kaba mynta.