La bun ki thliew ki syar haka surok bah Shillong Jowai

Syllad | The Rising MeghalayaSeptember 4, 2021

Ki nongleit nongwan na Shillong Jowai kila pynpaw iaka jingbitar ia ka jingsniew tasam ka surok bah National Highway 6 namar ba katba nangmih ki sngi ka surok kala nangjot bad bun sa tang ki thliew ki syar.

U Dr. R Phawa uba leit ba wan khlieh la sngi sha Jowai Shillong ula ther tyngeh iaka sorkar bad ki nongmihkhmat kiba la leh bymsuidñiew ban shna ne marmot iaka surok bah na Mookyndur-Puriang kumjuh ka surok Jowai Bypass (kaba iaid lyngba ka shnong Khliehtyrshi bad Mihmyntdu).

“Ka jinglong jingman kane ka surok kaba la dap da ki thliew ki syar ka kren khamjam iaka jinglong mutlop kane ka sorkar ban peit iaka jingshngain ka iaid ka ieng u paidbah,” la ong une u doktor.

Ia kane ka surok bah National Highway 6 kumjuh ka Jowai Bypass la palat 1 snem tam mynta la shu ieh khlem da maramot bad ki thliew kiba heh kila paw bad kylla long kum mki pung um.

Une u doktor ula kynthoh ba ki toll gate ne ki jaka khrong pisa ka NHAI kila nang bun nang jyllei ha kaba ha Rilum Jaintia ki don ha Lumshnong bad kawei Ialong nalor ka Ri Bhoi bad East Khasi Hills.

“Kine ki toll gate ki khrong pisa da ki lak ki klur ban pynbha ia ki surok hynrei phewse da markhongpong. kam don jingmyntoi ei ei haba peit kam wanrah ia ki surok ki highways kiba kat kum ka standard ba lah thew lah mang. Tip shaei jah ka pisa katba ia ka surok long kum ka nurok ka ksew kum ka jaka sum ki sniang haba iaka surok ki ong ka dei u budlum ka roi ka par,” la kren bitar u Dr R Phawa bad bynrap ba ki surok national highway ki dang shah iehbein sha nongkyndong ym tip shuh.

Ula ong shuh shuh “Ban iaid ban niah kali ym long shuh, ha baroh shi lynter ka surok national highway 6 satang ki thliew ki syar (potholes) suda. Iaid ruh tyngkhuh sangeh ruh blok sa ka aksiden.”

Une u doktor ula ong naduh u CM, Myntri Transport, Myntri PWD bad ki nongmihkhmat ka rilum Jaintia shaei ki jah. Ula buh jingkylli hato kim iohi iaka jingsniew ka surok ne ki ia her na suiñ na shnong sha Shillong, Tura,  Williamnagar, Ampati, Khliehriat Wahiajer, Mairang, Pynursla ter ter.

“Ko sorkar sngewbha peit lem ia ngi ki ba pyndonkam surok. Lada niah da kali private ne kali kamai ba ngi hap hi ban siew tax ym donlad ia ngi ban her ban ioh escort ban ioh vip vvip tag,” la ong u doktor Phawa.