La dep tei palat 200 tylli ki iingskul LP ba thymmai: Rakkam

Syllad | The Rising MeghalayaAugust 8, 2024

U Myntri ka tnad Pule Puthi u Rakkam A Sangma u la pyntip ba ka jingtei ia palat 200 tylli ki building ba thymmai jong ki skul LP la lah ban pyndep bad sa kumba palat 100 kiwei pat yn lah ban pyndep hapoh jong une u snem mang tyngka.

Haba kren sha ki lad pathai khubor ha ka 7 tarik Nailar, u Sangma u la ong ba ka sorkar ka don ia ka jingkut jingmut kaba skhem bad ka la dep pynkhreh lypa ia ka mang tyngka ban shna ia ki iingskul bathymmai bad kumjuh ruh ban pynthymmai bad maramot ia ki iing skul kiba la jot bad julor hapoh kine ki ar snem ki ban wan.

U la pyntip ruh ba ki don palat 2000 tylli ki skul Lower Primary jong ka sorkar bad la pynbynta ia ki katkum ka jingdonkam ka jong ki.

Nalor kata une u Myntri u la ong, “Ha kine ki san snem ba la dep, ngi la iohi ia  shibun ki jingkiew bad haduh palat 200 tylli ki iing skul bathymmai la dep ban tei, bad hapoh une u snem mang tyngka, ngin sa don shuh shuh sa palat 100 tylli ki iing skul thymmai.”

Haba kylli, u Sangma u la ong, “Ha kine ki 50 snem ba la dep ka bynta kaba iadei bad ka jingtei ia ki iing skul la shim ba kam dei satia ka mat kaba kongsan. Hynrei dei tad hadien ka jingwan jong kane ka sorkar ba u Myntri Rangbah ka Jylla u Conrad K Sangma ha kine ki san-hynriew snem ba la dep u la pyntreikam ia ka mission mode hapoh ka jinghikai mission ha kaba kine ki jingtei baroh ki la mih mynta.”