La hap pynkynriah biang iaka jingialang ka JAC ba shong quarantine u Chief Minister

Syllad | The Rising MeghalayaJune 29, 2020

Ka jingialang kaba la thmu ban long mynta ka sngi hadpeng ka Joint Action Committee- ka synjuk jong ki nongniah bad trai trok, Jaintia Hills Cement Manufacturer Association (JHCMA) bad ka tnad transport kaban khlieh da u Chief Minister ka Jylla u Conrad K Sangma la ban pynkynriah biang namar ba u hap ban shong quarantine hadien ba ula wan na Manipur.

U Commissioner & Secretary incharge ka tnad Transport ula phah shithi sha ki nongialam ka JAC ba kynthup sha u president ka JHTOA, president MTU, president AJCCTA bad u president JHCMA ba ka jingialang ha kaba iadei bad ka dor thymmai ban kit ban bah ki trok la pynknriah sha ka 13 tarik u July (Naitung) 2020 haka por 4 pm ha Auditorium,Yojana Bhavan.

Ha kane ka jingialang yn iadonlang u Myntri Rangbah bad u Myntri ka tnad Transport bad la kyrpad ia baroh ki synjuk ban wan tang 15 ngut shi seng bad ban bud iaka kyndon social distancing ne ban don ka jingiajngai.

Kumban shu pynkynmaw kane ka jingialang kadei halor ka jingpynbna kaba la pynbna ka sorkar ha u bnai Kyllalyngkot (January) 13 tarik, 2020 halor ka bai kit bai bah thymmai ki trok ha Jylla.

Kawei pat ka khubor kalong ba ka Sorkar ka la pynkynriah ia kane jingialang namar bala pynjari lockdown mynta hapoh Guwahati ka ban kut haduh ka 12 July (Naitung) 2020 bad ki nongpyniaid jong cement factories ruh kim ioh ka lad ban wan.

Nakaliang ka JAC ka kyntu ia baroh ki dkhot jong ka JAC bad ki nongniah trok bad trai trok ba iai shah tad haduh 13 tarik Naitung ban ioh iaka rai kaba khatduh halor ka bai kit bai bah thymmai, la ong u Publicity Secretary ka JAC u Jersom Shylla.