La ioh environmental clearance ka Star Cement ban tih mawshun na Brishyrnot

Syllad | The Rising MeghalayaJune 15, 2021

Ka Star Cement Meghalaya Limited kala ioh Environmental Clearance naka Ministry of Environment, Forest and Climate Change na ka bynta ka par Mawshun kaba heh 42.051 Hectare kaba don ha ka shnong Brishyrnot, East Jaintia Hills District.

Na kane ka par mawshun ka Star Cement kan pynmih haduh 2.507 Millon ton bad u 0.217 ki maw shale ne ki dew sain dewbilat.

Kane ka jingioh environmental clearance kala pynkyndit ia kiba bun ki sengbhalang kiba pyrshah ia kane ka jingpynheh mar mawshun kane ka kharkhana.

Kumban shu pynkynmaw ba ka public hearing kaba khatduh kaba la khot ka MSPCB kalong ha ka 21 tarik Naiwieng 2020 kaba la poi shaduh u pud ban wanrah ka jingmynsaw bad kala don ruh ka jingsiat lyer pynsat khmat ki pulit ban pynpra ia u sengbhalang uba la tur puk sha ka ophis DC barim ka Khliehriat.

Kiwei pat ki public hearing kiba la pulom ki long haka 19 tarik Risaw 2019 bad 30 tarik Kyllalyngkot 2020.

Ki sengbhalang kiba pyrshah ia kane ka jingpynheh mawshun kalong naduh ka JSU, KSU, FKJGP, HANM, HYC, EJNC, STIEH bad kiwei kiwei hadien ba pulom bun tylli ki public hearing kila kmen phewse kila shah shet ha u dek.

Ka tnad kam khlaw jong ka jylla ruh naduh ba sdang ban sorjamin ha u snem 2019 ia kane ka jaka kala dep ai ksai lypa ba kane ka jaka ka jngai na ka Eco Sensitive bad ka hap ka jaka bym don khlaw.

La ong ba kane ka jaka khlong mawshun ka jngai 1.46 KM na ka Narpuh Wildlife Sanctuary bad 0.25 na ka Eco sensitive zone bad kam ktah na kaba la buh ka iing bishar ba hakhliehduh ka ri kaba 1.20 KM.

Mynta ka jingkylli kalong ba kine ki kharkhana kin wanrah iaki kot ki bor kum ki puh shilum ban khlong maw bad ban pynbthei iaki bom ban pynpait iaki maw, hato kane kam ktah iaki mrad ki mreng ki ba don ha Narpuh Wildlife Sanctuary kaba riewspah ha ka jingdon ki sim ki doh, ki thabalieh. Kane ka khlaw ka don ruh iaki mrad ba kyrpang ki Hulu ne ki Hoolock Gibbons, ki khla, ki skei, ki hati bad kiwei kiwei ki mrad bala jan duhjait.

Nalor kata hato ka sorkar jylla bad ka tnad ka kam khlaw ka lah ne em ban pynthikna ba kine ki kharkhana kin nym kyntur pud ban sei ia une u mar pohkhyndew nalor ba ka um ka wah Lukha ba pawnam ruh la kynnoh ba kala julor bad jaboh ka dei na ka jingwan ki kharkhana dewbilat ha katei ka thain.