La ioh sei ia baroh 4 tylli ki metiap na ka jingtwa khyndew ha Nongpriang

Syllad | The Rising MeghalayaJune 1, 2024

Ka kynhun aijingiarap na ka Tnat Fire & Emergency Services ha ryngkat ka State Disaster Relief Force (SDRF) kila lah ban sei noh ia baroh ki saw tylli ki met iap jong ki lanot twa khyndew ha ka shnong Nongpriang, East Khasi Hills haka sngi Thohdieng.

Katkum ka khubor ba la ioh la iathuh kitei ki kynhun aijingiarap ha ka por mynstep ki la ioh shwa ban sei ia kawei ka metiap bad ha ka por janmiet ki la ioh ban sei noh ia artylli kiwei pat.

Shwa kane ki kynhun aijingiarap ha ka sngi Palei ki la ioh ban sei nyngkong ia ka metiap jong uwei u rangbah uba kyrteng u Bah Phisar Nongrum 75 snem, katba haka step 31 tarik Jymmang ki la ioh ban sei sa ia ka metiap jong u Lumlang Riahtam uba dang 16 snem rta.

Haba bteng ia ka jingwad khlem shongthait ki kynhun aijingiarap ki la ioh biang ban sei ia ki artylli kiwei pat ki metiap kiba dei jong u Bah Kynmaw Syngai 70 bad ka Kong Benti Riahtam 60 snem rta.

Ha kaba iadei bad kane ka jingjia ba sngewsih na ka liang u Deputy Commissioner ka East Khasi Hills, u SC Sadhu ula pynbna ia ka jingiarap pisa kaba long mar T.4 lak sha kiba haiing jong kine ki lanot.

Lah ban kdew ba kine ki sawngut ki briew ki la duh noh iala ka jingim hadien ba ka jingtwa khyndew kaba jur ka la leit ban bad pynjulor ia ki artylli ki iing ha ka shnong Nongpriang ha ka jingjia kaba la jia ha ka 30 tarik mynta u bnai.