La ioh sei ia kawei metiap na krem dewiong ha Umrangso hapdeng ka jingtrei borbah

Syllad | The Rising MeghalayaJanuary 8, 2025

Ki kynhun aijingiarap kiba la trei borbah ha ka step jong ka 8 tarik Kyllalyngkot ki la ioh ban sei noh ia kawei ka metiap jong uwei u rangbah napoh ka krem dewiong ha Umrangso kaba ha Dima Hasao district, Assam.

Ia kane ka metiap jong une u rangbah uba kyrteng u Rajen Sherch, 42 snem rta uba dei na ka shnong Udaypur, Nepal la ioh ban sei noh da ki dkhot ka Tnad NDRF bad ki nongngam um na ka Tnad shipai Army Para Divers ha ka por kumba 8:45 mynstep na katei ka krem dewiong ba la pyntreikam beain hadien ba la aiti noh sha ki bor pulit.

Lah ban kdew ba palat 12 ngut ki nongtrei par ki la sahkut noh shapoh kane ka krem dewiong kaba jylliew naduh ka step sngi Nyngkong ba la lah, ha kaba ka jingkiew jong ka um hapoh kane ka krem ka la pynshem shitom shibun ha kaba iadei bad ka kam aijingiarap.

Napdeng baroh ki 27 ngut ki nongtrei par kiba la sahkut ha kane ka krem 10 ngut na ki, ki la ioh lait im kat hapdeng ka 13 haduh 17 ngut kiwei pat ki dang bteng ban sahkut shapoh jong kane ka krem.

Ki kynhun aijingiarap kiba la wan iashim bynta ha kane ka kam pyllait im kaba dang iai bteng ki kynthup na ka Tnad NDRF, SDRF, shipia na ka Indian Army, Navy bad kiwei pat ki tnad.

Ki bor pulit ka thain ki la kem noh ia u Punish Nunisa ia uba la kynnoh ba u dei u trai jong kane ka par dewiong hapoh ki kyndon jong ka Mines and Minerals (Development and Regulation) Act.

Kane ka par dewiong ka dei kaba la pyntreikam beain bad kaba la pynmih ruh ia ka jingkylli halor ka jingdon bynta jong ki bor sorkar ka thain.

Mynta ki kynhun aijingiarap ki dang bteng ban pynlong ka jingwad ia kiwei pat ki nongtrei par kiba dang jah rngai, katba na ka liang kiba haiing hasem jong kine ki briew kiba dang jah rngai ki la don hapdeng ka jingkutlad bad iai ap ia ka khubor.