La ioh sei sa ia kawei ka metiap na ka jingtwa khyndew ha Nongpriang

Syllad | The Rising MeghalayaMay 31, 2024

U Deputy Commissioner ka East Khasi Hills, u SC Sadhu u la pyntip ba ki kynhun aijingiarap ha ka step 31 tarik mynta u bnai ki la ioh ban sei noh sa ia kawei pat ka metiap napdeng ki sawngut ki lanot kiba la khlad noh na ka jingtwa khyndew hadien jong u lapbah ha ka shnong Nongpriang, Sohra Civil Sub Division, East Khasi Hills District.

U la ong ba ia kine ki artylli ki metiap la ioh ban sei na kajuh ka jaka ha kaba ka jingkhyndew ka la leit ban ban ia ki artylli ki iing.Ia ka metiap kaba nyngkong kaba dei jong u Bah Phisar Nongrum la ioh ban sei ha ka 30 tarik mynta u bnai.

Ki kynhun aijingiarap na ka Tnat Fire & Emergency Services, ka SDRF bad ki heh sorkar napoh Sub Division ki la ia don ryngkat lang ha kane ka jingpyrshang ban ioh sei ia kine ki metiap jong kine ki lanot.

Hynrei namar ka jingdon jong uwei u mawbah uba la khyllem na ka jingtwa khyndew kumta ki dang iakhun ban weng ia une u maw khnang ban ioh sei sa ia ki artylli kiwei pat ki metiap, ong u heh ka district.

Nalor kata u DC u la pynbna ruh ia ka jingai jingiarap kaba mar T.4 lak sha kiba haiing hasem jong kine ki lanot.

Lah ban kdew ba ha ka 30 tarik mynta u bnai kumba sawngut ki briew ki la khlad noh hadien ba ka jingtwa khyndew ka la leit ban bad pynjulor ia ki artylli ki iing ha ka shnong Nongpriang.

Kine ki sawngut ki lanot ki dei kiba la tip kyrteng kum u Bah Phisar Nongrum ba 75 , Bah Kynmaw Syngai  70, Kong Benti Riahtam 60 bad u samla Lumlang Riahtam 16 snem rta.