La ithuh ia u runar uba lum pisa beain ha ka kyrteng ka SMB naki nongshong dukan madan

Syllad | The Rising MeghalayaJune 24, 2024

Ka Shillong Municipal Board (SMB) ha ka 24 tarik Jylliew ka la aiti ia ka dur jong u runar uba donkti ha kaba lum pisa beain na ki nongshong dukan madan ha Shillong kumjuh ia ki receipt kiba la shna thok kum ka sakhi sha ki pulit ha ryngkat ka ejahar khnang ba kin pynlong ka jingthwet ban ioh kem bad pynshitom katkum ka ain.

Kane ka la wan long ruh hadien ba u Chief Executive Officer ka SMB dang ha kine ki khyndiat bnai ba la dep u la ujor da ka ejahar sha ki pulit halor ka jingdon jong uwei u riew shukor uba leit lum pisa beain na ki nongshong dukan madan ha ka kyrteng jong ka SMB da kaba pyndonkam ruh da ki receipt book kiba shu shna thok.

Kane ka jinglum pisa beain kalong na ka bynta ban pynrung kyrteng ia ki nongshong dukan madan, kata ha ka por ba ka Town Vending Committee (TVC) lyngba kane ka ophis dang bishar bniah ha kaba iadei bad ka jingpynrung kyrteng ia ki nongshong madan katkum ki kyndon jong Meghalaya Street Vending (Protection of Livelihood and Regulation of Street Vending) Scheme, 2023.

Na ka liang u CEO u pynshai ruh ba kam shym don satia kano kano ka jingshim pisa na ka bynta ka bai pynrung kyrteng lyngba ka Town Vending Committee.