La ithuh ka sorkar ia u synsar kum u mar rep: Banteidor

Syllad | The Rising MeghalayaJune 24, 2019

SHILLONG: Ka sorkar Meghalaya kala pynmih jingpynbna ban ithuh noh ia u synsar kum u mar rep bad ki nongrep synsar kin lait noh na ka jingshah ot khajna, la ong u Myntri sorkar jylla ba dei peit ia ka tnad Agriculture, u Bah Banteidor Lyngdoh.

Ia kane ka jingpynbna la mih na ka tnad Forest and Environment ha ka 14 tarik u Jylliew, 2019 bad la rai ban pynkylla ia u synsar kum u mar rep katkum ka kyndon Registering and Harvesting of Agro-forestry Plantations, 2017 ban lait na ka jingshah ot khajna.

U Bah Banteidor u la iathuh ba kane ka rai la shim ha ka jingiakynduh lang u Myntri Rangbah, u Myntri ka tnad khlaw, u Symbud Myntri Rangbah bad ma u na ka tnad rep.

Ula ai khublei ia ka sorkar MDA ha ka jingialam u Conrad K Sangma kum u Myntri Rangbah bad ula ong “Nga pynpaw ka jingsngew nguh ia u Myntri Rangbah uba shimkhia iaka jingeh ki nongrep bad ban ai ka jingmynjur ban ithuh ia u synsar kum u marep”.

Kum ban shu pyn-kynmaw ba dang shen ka sorkar jylla kala ithuh ruh ia u sohmarit bad sla tyrpad kum ki mar rep bad mynta kala ithuh ia u synsar kaba long ka jingkyrkhu iaki ki nongrep ba kim hap shuh ban siew khajna ia kine ki mar rep.

“Kane ka dei ka khubor kaba kmen na ka bynta ki nongrep kiba rep synsar bad ka dei ka jingdawa kaba la slem bha ban pynkylla mar rep ia u synsar bad kane kan wanrah jingmyntoi ia ki paid nongrep”, la ong u bah Banteidor Lyngdoh.

“Nga kyntu ia ki nongrep synsar ban long kiba ia tylli ba kin lai ban shah khniot dor ha ki nongkhaii bad ba ki dei ban bat ia ka dor ka mur namar nga tip ba u synsar u don la ki jong ki kyrdan haba iadei bad ka jingbha kata uba nyngkong, ba ar bad balai bad ki nongrep ki pyniaid katkum ka dor,” la ong U Myntri kam rep kam riang.

Haba kylli lada ka sorkar ka don jingthmu ban buh dor ba ryntih ia une u mar, u la ong, “Ka sorkar kan nym buh ka dor ban die ia u synsar, hynrei donkam ba ki nongrep ia une u synsar ba kin long ba ia tylli bad rai ia kawei ka dor”.

U la ong ruh ba lyngba ka jingithuh ka sorkar ia u synsar kum u mar rep agro-forestry kan kyntiew ia ka ioh k kot jong ki nongrep ha baroh kawei ka jylla ba kynthup ha ri lum Khasi, Jaintia bad Garo Hills.