La jot ka madan plastic ka MFA, ap sa ka madan Kiang Nangbah

Syllad | The Rising MeghalayaJanuary 15, 2020

SHILLONG: Ka madan plastic (artificial turf) jong ka Meghalaya Football Association (MFA) ha Polo kala sdang ban sniew bad jot rathai, namar ka jingpyndonkam ia kane ka madan kala long palat liam.

Kane ka madan kala sniew naka bynta jong ka surok kaban leit sha JN Stadium Polo bad ka bynta jong ka kol kaba sdang naduh ka bynta jong ka D, bud pat sa ki bynta jong ka 6 yard ka jaka ba la ruid line lieh ba ieng u nongap kol kaba dei ka jaka ban shut ia ka penalty.

Kane ka khubor ka long beit ban pynpaw sha ki paidbah ba ieit ia ka phutbol, bad kano kano ka tiar lada ym nang ban pyndonkam ia ka, ka jingduh ne sniew ka la ap lypa hakhmat.

Naduh ba ka Fifa ka la ai sngewbha ia kane ka madan, ym lah ban len ba ka la long shisha ka jingkyrkhu kaba khraw, ha kaba la lah shisha ha kaban pyndonkam pura ia ka, kata naduh ka Shillong Sports Association (SSA), nangta sa ki klob ialehkai ka jylla kiba la juh iakhun teng ha ka lympung ialehkai jong ka I. League nalor ki klob ialehkai ba iashim bynta ha ki lympung ialehkai ka SSA bad khlem da klet ia ki prokram ia kilan met jong man kawei pa kawei ka kynhun ialehkai ka jylla hapoh ka lama jong ka MFA.

Hynrei kumba ka long ia mynta, ka jinglong jingman jong kane ka madan ka donkam palat ban maramot kyrkieh ia ka, khnang ban ioh pynbha ïaka jingjot bad ka donkam ba kane madan ioh shwa ia ka por ban shongthait.

Kumne ka apot ka ap iaka madan iaka Kiang Nangbah Stadium jong ka West Jaiñtia District Sports Association (WJDSA) kaba don kane ka juh ka madan plastic namar bym shym la sumar bha ïa kane ka madan ha Jowai.

Ka madan Kiang Nangbah Stadium ruh kala donkam ban sat ïa u phlang plastic (brush) namar ba ki rubber ne ki kynja jri uba la theh lang ha u phlang plastic kila mih shabar ka madan. Lada ki bor pyniaid ki leh bymsuidniew bad kut sa tang haka aiwai ban kilan ki kynhun ialehkai kam slem ba kane ka madan ruh kan jot.

Kaba sngewsih shuh shuh kane ka madan haba jur u slap ka lyer, ka madan ruh ka at lyer bad bunsien la hap ban pynsangeh ïaki jinglehkai haba ther u lap bah.