La khang ban wanrah iaki mar na Assam bad Ri Bhoi ha Namdong

Syllad | The Rising MeghalayaJuly 26, 2020

Ka jingialang kaba la pynlong da ka kynhun ki 30 Waheh Shnong haka jingiadonlang u MDC Mynsngat Khanduli bad u heh Raij Namdong kila rai ban khang shuwa shipor iaka Iew Khyllaw ha Namdong bad la khang ruh ban wanrah iaki mar kum ki soh na Assam bad na Ribhoi district tad haduh bala pynbna da kumwei.

Kane ka jingialang kaba long haka 25 tarik une u bnai kala rai ruh ban pyrkhing iaka jingwan rung ki briew kiba nabar shnong sha ka thain baroh kawei.

Ki nongshong shnong naduh ka shnong Wahiajer ter ter shaduh Namdong ruh la khang iaki ban wan ban leit sha kine shnong namar bala hap khappud bad ka Assam.

Kiwei kiwei ki rai kiba la shim ha kane ka jingialang ki dei halor ka jingbthah ka tnad ka koit ka khiah ban tem iaka jingpur ka khlam Covid-19.

La bthah iaki paidbah kiba die dukan ban register iaki dukan ha ki ophis jong ki waheh shnong, deng mask, buh iaki dawai sanitizer ban sait kti ban bud iaka social distancing.

Ki nongniah kali kiba hiar dih sha bam ja ruh ki dei ban bud ryntih bad ki nongniah trok ruh ki dei ban pyntip sha ki waheh shnong ne nongialam ka Raij Namdong shuwa ban rung shapoh shnong ban buh jingthoh iaka leit ka wan jong ki.

Haba jia ba iap briew ruh dei ban pyntip sha ki waheh shnong bad la kyntu ban buh register ban thoh iaka kyrteng bad mobile number jong ki nongwan sngewlem bad kumjuh ia kiba iathoh shong kurim ruh ki dei ban thoh haka register.

Ki dukan ha Namdong kidei ban plie naduh ka por 8.00 baje mynstep haduh 7.00 baje janmiet. Ym shah ban pynlong iew ha surok lait noh tang ki dukan kata da kaba bud iaki kyndon ka Social Distancing.

Ki trai mawsalin mawria kim bit ban lumthup maw harud surok naduh Ladmynnor haduh Namdong bad ki kali kit maw yn shah tang ia trai kali na Ksehrynshang haduh Saitsama.

Ha kawei pat ka khubor ka Dorbar Shnong Ksehryngshang haka jingialang kaba la long haka 24 tarik mynta u bnai ha iing LP School Ksehryngshang ka la shim iaka rai ban khang iaka jingrung jingmih ki briew nabar shnong shapoh u pud u sam ka shnong.

Kino kino ki briew kiba nabar kiba rung shapoh shnong ki hap ban ioh jingbit ne iohbor shwa na ka shnong da kaba phone haki number jong u Waheh Shnong u M Timung 8787631328/7085647710.