La khang pyrshah ban tih maw tih shyiap bad bret jakhlia ha lynter ka wah Myntdu

Syllad | The Rising MeghalayaApril 5, 2025

U District Magistrate ka West Jaintia Hills Disrict, ula pynjari da ka hukum hapoh ki kyndon 163 BNSS kaba la khang pyrshah ia ka jingtih maw tih shyiap ha lynter jong ka wah Myntdu bad ki rud wah jong ka.

Katkum kane ka hukum kaba la pynmih haka 1 tarik Iaiong la khang pyrshah ruh ban sait jain, sait kali, bret jakhlia bad pyntuid jaboh bad khyndew na kaba shna surok bad kiwei pat shapoh ka wah Myntdu.

Kane ka hukum ka la ong, “La sakhi da baroh ba ka jinglong jong ka um ha ka wah Myntdu lem bad ki shnat wah jong ka ki la shah ktah jur bad kylla khyndew ktieh ha u snem ba la dep namar ka jinglang jaboh ha ki jaka ba shong um ha ki jaka ba markhap jong ka wah Myntdu, bad da ka jingwan jong ka lyiur ka don ka jingma halor ka jingtwa khyndew bad ka jingtuid ka khyndew bad ki jaboh jabain shapoh ka wah bad ki shnat wah jong ka kiba lah ban pynjaboh ia ka mariang, ka jingkhanglad ia ka jingtuid jong ka um bad ka ban ktah ia ki jingthaw kiba im ha um.

Ka hukum ka ong ba ka jingtih maw tih shyiap ha ki bynta jong ki rud wah ka Myntdu ki la noh synniang sha ka jingpynjakhlia bad pynsniew ia kane ka wah bad kaba la ktah ruh ia ka jingsam um sha ka sor Jowai baroh kawei bad kaba buh jingma ia ka koit ka khiah jong ki paidbah, ki jingthaw kiba don hapoh ka wah bad ia ka mariang.